युनाइटेडको जितमा इगालोको दुई गोल, एफए कपको क्वार्टरफाइनलमा
<p>काठमाडौं। ओडियन इगालोको दुई गोलप्रेरित म्यानचेस्टर युनाइटेडले गएराति डर्बी काउन्टीलाई ३-० ले हराउँदै एफए कपको क्वार्टरफाइनलमा स्थान बनाएको छ।</p>
<p>३० वर्षे इगालो यही जनवरी ट्रान्सफर विन्डोमा युनाइटेडसँग अनुबन्ध भएका हुन्।</p>
<p>उनको अनुबन्धलाई लिएर क्लबको आलोचना भएको थियो। तर, उनले पहिलो रोजाईमा परेको दुई खेलमा तीन गोल गरिसकेका छन्।</p>
<p>‘‘अन्तत: मेरा सहयात्रीहरूले ममाथि विश्वास गरेका छन्। प्रशिक्षक र समर्थकले पनि विश्वास गरेका छन्। यसलाई निरन्तरता दिन चाहन्छु,’’ दुई गोल गरेपछि इगालोले भने, ‘‘कसले के भन्छ मलाई मतलव छैन। हामी यो लयलाई निरन्तरता दिन चाहन्छौं र यो सिजनलाई सक्दो राम्रो बनाउन चाहन्छौं।’’</p>
<p>विपक्षी टीम युनाइटेडका हजारौं समर्थकले वायन रूनी नाममा रंगलशाला गुञ्जयमान बनाएका थिए। युनाइटेडका पुर्व स्ट्राइकर रूनी दुई फ्रीकीकमा गोल नजिक पुगेका थिए।</p>
<p>प्रिमियर लिगको क्लब युनाइटेडले लुक शाको गोलबाट ३३औं मिनेटमा अग्रता लियो।</p>
<p>४१औं मिनेटमा इगालोले अग्रता दोब्बर बनाए। ७०औं मिनेटमा इगालो अर्को गोल थपेपछि युनाइटेडले क्वार्टरफाइनल पक्का गरेको थियो।</p>
<p>युनाइटेडले १२ पटक एफए कपको उपाधि जितिसकेको छ। जुन कीर्तिमानी विजेता आर्सनलको भन्दा एक उपाधिले कम हो।</p>
<p>डर्बी काउन्टीले १९९९ पछि एफए कपको पाँचौं चरण खेलेको यो छैटौं पटक हो।</p>
<p>तर, कुनै सिजन डर्बी काउन्टी क्वार्टरफाइनलमा स्थान बनाउन असफल रह्यो।</p>
<p>२०१७ मा युनाइटेड छाड्नुअघि रूनीले २५३ गोल गरेका थिए। ३४ वर्षे रूनीको प्रभाव पनि उस्तै छ। तथापी गएराति दुई फ्रीकीकमा गोल नजिक पुगे पनि रूनीले गोल गर्न सकेनन्।</p>
<p>‘‘रूनीलाई सबैले माया गर्छन्। उनको योगदानलाई युनाइटेडका प्रत्येक समर्थकले सम्मान गर्छन,’’ युनाइटेडका प्रशिक्षक ओले गनर सोल्सारले भने, ‘‘उनले आज पनि राम्रो खेले। उनले आफ्नो प्रतिभा देखाए।’’</p>
<p>पछिल्लो नौ खेलमा अपराजित रहेको युनाइटेडले अब सेमिफाइनल प्रवेशका लागि नर्विच सिटीसँग प्रतिस्पर्धा गर्नेछ।</p>
<p>नर्विच सिटी प्रिमियर लिगको पुछारमा छ भने युनाइटेड पाँचौं स्थानमा छ।</p>
प्रतिक्रिया दिनुहोस्
.jpg)
