लिभरपुलको अपराजित यात्रामा पूर्णविराम
<p>काठमाडौं। प्रिमियर लिगको शीर्ष क्लब लिभरपुलको लिगमा ४४ खेलसम्मको अपराजित यात्रामा गएराति वाटफोर्डले पूर्णविराम लगाइदिएको छ।</p>
<p>भिकारेज रोडमा वाटफोर्डले लिभरपुललाई ३-० ले पराजित गरेको हो।</p>
<p>दोस्रो हाफमा इस्माइला सारले दुई गोल गरे भने कप्तान ट्रोए डीनेले अर्को गोल थपेपछि लिभरपुलको अपराजित यात्रामा पूर्णविराम लागेको हो।</p>
<p>लिभरपुलले प्रिमियर लिगमा लगातार पछिल्लो १८ खेल जितेको थियो।</p>
<p>गएराति पनि विजयी नतिजा निकालेको भए लगातार सबभन्दा धेरै खेल जित्ने कीर्तिमान बनाउँथ्यो।</p>
<p>तर, लिभरपुलको यात्रामा वाटफोर्ड लगारो बन्यो।</p>
<p>घरेलु मैदानमा उत्कृष्ट प्रदर्शन गरेको वाटफोर्डले अरू पनि थुप्रै गोलको राम्रो मौका पाएका थियो। त्यसलाई लिभरपुलका गोलकिपर एलिसानले बचाइदिए।</p>
<p>गत साता वेष्ट ह्यामविरुद्ध लिभरपुलले दुई शुन्यले पछि परेको स्थिति उल्टाउँदै ३-२ को नतिजा निकालेको थियो।</p>
<p>वाटफोर्डमा लिभरपुलले भने त्यही नतिजा हात पार्न सकेन। लिभरपुलले वेष्ट ह्यामसँग खेल्नु अघि च्याम्पियन्स लिगमा एट्लेटिको मड्रिडसँग पराजित भएको थियो।</p>
<p>लिभरपुल यसअघि २०१९ जनवरीमा म्यानचेस्टर सिटीसँग पराजित भएको थियो। त्यसपछि सिटी ४४ खेलमा अपराजित थियो।</p>
<p>अप्रत्यासित जितसँगै वार्टफोर्ड रेलिगेशन क्षेत्रबाट माथि उक्लिएको छ। वाटफोर्डको २७ अंक छ।</p>
<p>रेलिगेशन क्षेत्रमा रहेको बर्नमाउथसँग समान २७ अंक भए पनि गोलअन्तरमा वाटफोर्डमाथि रहेको हो।</p>
<p>लिभरपुलले अझै शीर्ष स्थानमा २२ अंकको अग्रता कायमै राखेको छ।</p>
<p>इङ्लिस प्रिमियर लिगमा गएराती वेष्ट ह्यामले साउथह्याम्पटनलाई ३-१ ले पराजित गर्‍यो।</p>
<p>न्युक्यासल घरेलु मैदानमा बर्नलीसँग गोलरहित बराबरी खेल्दा चौथो स्थानको चेल्सी पनि रेलिगेशन क्षेत्रको बर्नमाउथसँग २-२ को बराबरीमा रोकियो।</p>
<p>तेस्रो स्थानको लेस्टर सिटी पुछारको क्लब नर्विच सिटीसँग १-० ले पराजित भयो।</p>
प्रतिक्रिया दिनुहोस्
.jpg)
