भिल्लारियालमाथि एट्लेटिको मड्रिडको जित
<p>काठमाडौं। जाओ फेलिक्सले पुनरागमनलाई सुखद बनाउँदा एट्लेटिको मड्रिडले गएराति स्पेनिस ला लिगामा भिल्लारियाललाई ३-१ ले पराजित गरेको छ।</p>
<p>एट्लेटिकोले एक शुन्यले पछि परेको स्थिति उल्टाउँदै विजय हासिल गरेको हो।</p>
<p>चोटका कारण फेलिक्स लामो समय मैदान बाहिर थिए। गएराति पनि उनी ५७औं मिनेटमा भिटोलोको स्थानमा मैदान छिरेका थिए।</p>
<p>फेलिक्सले ७४औं मिनेटमा कोकेको पासलाई सदुपयोग गर्दै एट्लेटिको तीन अंक पक्का गरे।</p>
<p>मशलमा लागेको चोटका कारण फेलिक्स गत जनवरीदेखी मैदान बाहिर थिए।</p>
<p>२० वर्षे फेलिक्स यसै सिजनमात्र बेनफिकाबाट १२ करोड ६० लाख अमेरिकी डलरमा एट्लेटिकोसँग अनुबन्ध भएका हुन्।</p>
<p>उनले सबै प्रतियोगितामा गरी पाँच गोल गरिसकेका छन्।</p>
<p>‘‘फेलिक्सबाट के अपेक्षा गरिएको छ, सबैलाई थाहा छ। उनी युवा नै छन् र सुधार गर्नुपर्ने ठाँउ धेरै छन्,’’ एट्लेटिकोका कप्तान कोकेले भने, ‘‘एट्लेटिकोमा अभ्यस्त हुन कठिन छ। प्रशिक्षक सिमोनी र टीम सहयात्रीका कुरा मनन गरे फेलिक्स सबैले हेर्न चाहेको जस्तो खेलाडी बन्नेछन्। चोटको कुरामा उनी भाग्यमानी रहेनन्। तर मलाई विश्वास छ, भविष्यमा उनी उत्कृष्ट खेलाडीको पंक्तिमा हुनेछन्।’’</p>
<p>एट्लेटिकोले २५ खेलबाट ४३ अंक जोडेको छ। सेभियाको पनि समान ४३ अंक छ।</p>
<p>तर, गोलअन्तरमा एट्लेटिको तेस्रो स्थानमा रहेको हो। सेभियाले गेटाफेलाई ३-० ले पराजित गरेको थियो।</p>
<p>एट्लेटिकोका प्रशिक्षक डिएगो सिमोनी निलम्बनका कारण स्ट्यान्डमा बसेर खेल हेरेका थिए।</p>
<p>भ्रमणकारी भिल्लारियालले १६औं मिनेटमा पाको एल्कासरको गोलबाट अग्रता लिएको थियो।</p>
<p>तर, भिल्लारियालले उक्त अग्रता जोगाउन सकेन। ४०औं मिनेटमा एट्लेटिकोका एन्जेल कोरेराले बराबरी गोल फर्काए।</p>
<p>६४औं मिनेटमा कोरेराकै पासमा कोकेले गरेको गोलमा एट्लेटिकोले अग्रता लियो।</p>
<p>त्यसको दश मिनेट वित्न नपाउँदै कोकेकै पासमा फोलिक्सले गोल गर्दै एट्लेटिकोको तीन अंक पक्का गरे।</p>
<p>एट्लेटिकोले ७ फागुनमा च्याम्पियन्स लिगमा साविक विजेता लिभरपुललाई १-० ले पराजित गरेको थियो।</p>
प्रतिक्रिया दिनुहोस्
.jpg)
