बार्सिलोनाको संघर्षपूर्ण जित
<p>काठमाडौं। रक्षक क्लेमेन्ट लेन्गलेटले निर्णायक गोल गरेपछि रातो कार्डको सामना गरेर मैदान छाडेको खेलमा बार्सिलोनाले रियाल बेटिसमाथि संघर्षपूर्ण जित हात पारेको छ।</p>
<p>साविक विजेता बार्सिलोनाले दुई पटक पछि परेको स्थिति उल्टाएको थियो।</p>
<p>सर्जियो कानालेसले पेनाल्टीमा गोल गर्दै छैटौं मिनेटमै रियाल बेटिसलाई अग्रता दिएका थिए।</p>
<p>त्यसको तीन मिनेट नवित्दै लियोनन मेसीको पासमा फ्रेन्की डी जोङले बराबरी गोल फर्काए।</p>
<p>नबिल फेकिरले २६औं मिनेटमा गरेको गोलमा घरेलु टीम रियाल बेटिसले पुनः अग्रता लियो।</p>
<p>पहिलो हाफको इन्जुरी समयमा मेसीको पासमा सर्जियो बुसकेट्सले बराबरी गोल फर्काए।</p>
<p>७६औं मिनेटमा फेकिरले दोस्रो पहेंलो कार्डको सामना गरेपछि रियाल बेटिस दश खेलाडीमा सिमित भयो।</p>
<p>लगत्तै लेन्गलेटले पनि दोस्रो पहेंलो कार्डको सामना गरेर बार्सिलोना पनि दश खेलाडीमा सिमित बन्यो।</p>
<p>जितसँगै बार्सिलोनाले शीर्ष क्लब रियाल मड्रिडसँगको दुरी तीन अंकमा झारेको छ।</p>
<p><strong>रियाल मड्रिडको सहज जित</strong></p>
<p>चाँडो गरी भएको खेलमा रियालले ओसासुनामाथि ४–१ को सहज जित हात परेको थियो।</p>
<p>घरेलु टोली ओसासुनाले युनाई गार्सियाको गोलबाट १४औं मिनेटमा अग्रता लिएको थियो। ३३औं मिनेटमा इस्कोले बराबरी गोल फर्काए।</p>
<p>३८औं मिनेटमा कप्तान सर्जियो रामोसको गोलमा रियालले अग्रता लियो।</p>
<p>८४औं मिनेटमा लकास भाजक्वेजले अर्को गोल थपे भने इन्जुरी समयमा लुका जोभिचले चौथो गोल गर्दै रियालको तीन अंक पक्का गरे।</p>
<p>जितसँगै रियालको २३ खेलबाट ५२ अंक भएको छ। दोस्रो स्थानको बार्सिलोनाले ४९ अंक जोडेको छ। तेस्रो स्थानमा गेटाफे छ। गेटाफेको ४२ अंक छ।</p>
<p>सेभिया भने सेल्टा भिगोसँग २-१ ले पराजित भयो।</p>
<p> </p>
प्रतिक्रिया दिनुहोस्
.jpg)
