सान्चो र हालान्डले रचे इतिहास
<p>काठमाडौं। युवा स्टार जाडोन सान्चो र इर्लिङ ब्राउट हालान्ड इतिहास रचेको दिन बोरूसिया डर्टमण्डले गएराति युनियन बार्लिनलाई ५-० ले हराएको छ।</p>
<p>इङ्ल्यान्डका सान्चो जर्मन बुन्डेसलिगामा २५ गोल गर्ने पहिलो युवा खेलाडी बने।</p>
<p>त्यस्तै नर्वेका हालान्ड बुन्डेसलिगाको पहिलो तीन खेलमा सात गोल गर्ने पहिलो खेलाडी बनेका छन्।</p>
<p>हालान्डले १८औं मिनेटमा गोल गर्दै डर्टमण्डको अग्रता दोब्बर बनाएका थिए। उनले ७६औं मिनेटमा व्यक्तिगत दोस्रो गोल गरेका थिए।</p>
<p>डर्टमण्डबाट तीन खेलमा उनको यो सातौं गोल हो। १९ वर्षे हालान्ड जनवरी सरूवा बजारमा साल्जबर्गबाट जर्मनी आएका हुन्।</p>
<p>उनले पहिलो दुई खेलमा ह्याट्रिकसहित पाँच गोल गरेका थिए। पहिलो दुई खेलमा उनी बैकल्पिक खेलाडीका रूपमा मैदान छिरेका थिए।</p>
<p>लिगमा १३६ मिनेट मात्र खेलेका हालान्ड लिगमा धेरै गोल गर्ने शीर्ष दश खेलाडीभित्र परिसकेका छन्।</p>
<p>"आज अलि कठिन भयो। तर पहिलो रोजाईमा खेल्न पाउँदा खुशी लाग्यो," हालान्डले भने, "म फिट हुदैँछु तर अझै सतप्रतिशत फिट भइसकेको छैन।"</p>
<p>सान्चोको गोलमा डर्टमण्डले १३औं मिनेटमा अग्रता लिएको थियो।</p>
<p>१८औं मिनेटमा हालान्डले अग्रता दोब्बर बनाए। ६८औं मिनेटमा मार्को रिउसले पेनाल्टीमा अर्को गोल थपे।</p>
<p>हालान्डलाई विपक्षी गोलकिपरले फाउल गरेपछि डर्टमण्डले पेनाल्टी पाएको थियो।</p>
<p>सान्चोको पासमा एक्सेल विटसेलले चौथो गोल गरे। ७६औं मिनेटमा हालान्डले पाँचौं गोल थपे।</p>
<p>जितपछि डर्टमण्ड ३९ अंकका साथ तेस्रो स्थानमा उक्लिएको छ। जुन शीर्ष स्थानको बायर्न म्युनिखभन्दा तीन अंकले पछि हो।</p>
<p>युनियन बर्लिन भने २३ अंकका साथ १२औं स्थानमा छ।</p>
<p>बायर्नले गएराति नै मेइन्ज०५ लाई ३-१ ले पराजित गर्दै शीर्ष स्थानमा उक्लिएको हो। </p>
<p>बायर्नको जितमा रोबर्ट लेवन्डस्की, थोमस मुलर र थियागो एलकान्ट्राले गोल गरे। मेइन्जका जेरी सेन्ट जस्टीले गोल गरेका थिए।</p>
<p>आरबी लिपजिगले बोरुसिया मोन्चेनग्लाडबाचसँग २-२ को बराबरी खेल्दै अंक बाडेका थिए।</p>
<p>बराबरी खेलेसँगै लिपजिग दोस्रो स्थानमा झर्‍यो भने मोन्चेनग्लाडबाच चौथो स्थानमा झरेको हो।</p>
<p>गएराति बुन्डेसलिगाको अन्य खेलमा औसबर्गले बेर्डर ब्रेमेनलाई २-१ ले हरायो।</p>
<p>होफिनहेइमले बायर लेभरकुसेनलाई पनि २-१ कै अन्तरमा पराजित गर्‍यो।</p>
प्रतिक्रिया दिनुहोस्
.jpg)
