शहीद स्मारक ए डिभिजन फुटबलः पुलिसले एपीएफलाई हरायो
<p>काठमाडौं। काठमाडौंमा जारी शहीद स्मारक ए डिभिजन लिग फुटबल प्रतियोगितामा नेपाल पुलिस क्लब विजयी भएको छ। </p>
<p>त्रिपुरेश्वरस्थित दशरथ रङ्गशालामा आजदेखि शुरू भएको नवौं चरणको पहिलो खेलमा पुलिस सशस्त्र प्रहरी बल (एपिएफ) क्लबलाई १–० गोल अन्तरले पराजित गर्दै विजयी भएको हो। </p>
<p>पुलिसको जित कप्तान भोलानाथ सिलवाल नायक बने। उनले खेलको १३ औँ मिनेटमा गरेको एक गोल नै पुलिसको लागि निर्णायक गोल सावित भयो।</p>
<p>कप्तान भोलाले पेनाल्टीमार्फत् गोल गरेका हुन्। रवि पासवानको कर्नरमा एपीएफका राजन गुरुङले पुलिसका भरत साहलाई धकेलेपछि रेफ्री प्रकाशनाथ श्रेष्ठले पुलिसलाई पेनाल्टी दिइएको थियो। <br />
सोही अवसरलाई सदुपयोग गर्दै कप्तान भोलाले गोल गरेका थिए।</p>
<p>खेलमा पुलिसका सौजन राई म्यान अफ दि म्याच घोषित भए। जितसँगै पुलिस लिगको पाँचौं स्थानमा उक्लिएको छ।</p>
<p>पुलिसले नौ खेलमा १४ अङ्क जोडेको छ। त्यस्तै पराजित एपीएफ नौ खेलमा पाँच अङ्क जोडेर अङ्क तालिकाको १३औँ स्थानमा छ। <em>रासस</em><br />
</p>
प्रतिक्रिया दिनुहोस्
.jpg)
