मेसीको गोलमा सेटीनको सुखद शुरूआत
<p>काठमाडौं। लियोनल मेसीले दोस्रो हाफमा गरेको गोलमा बार्सिलोनाले गएराती स्पेनिस ला लिगामा ग्रानाडालाई १-० ले पराजित गरेको छ।</p>
<p>दश खेलाडीमा सिमित भएको ग्रानाडामाथिको जितसँगै नयाँ प्रशिक्षक क्वेक सेटीनले बार्सिलोनामा विजयी शुरूआत गरेका छन्।</p>
<p>बार्सिलोनाले क्याम्प नोउमा ८० प्रतिशत बल पोसेसन राखेको थियो।</p>
<p>तर, सेटीनको टोलीलाई विपक्षी रक्षपंक्ति तोड्न भने हम्म हम्मे पर्‍यो।</p>
<p>६९औं मिनेटमा मेसीलाई फाउल गरेपछि जर्मन सान्चेजले दोस्रो पहेंलो कार्डको सामना गर्दै मैदान छाडे।</p>
<p>त्यसको सात मिनेट नबित्दै बार्सिलोनाले अग्रता बनायो।</p>
<p>अर्टुरो भिडालको पासमा मेसीले गोल गर्दै बार्सिलोनाको तीन अंक पक्का गरे।</p>
<p>मेसीले एन्टोइन ग्रिज्मानलाई पास दिए, ग्रिज्मानले भिडाललाई पास दिए, भिडालले दिएको पासमा मेसीले गोल गरे।</p>
<p>यससँगै अर्नेस्टो भाल्भर्डेलाई बर्खास्त गरेपछि बार्सिलोनाको प्रशिक्षकमा नियुक्त भएका सेटीनले ६ दिनपछि घरेलु दर्शकसँग खुशी साटे।</p>
<p>६१ वर्षे सेटीनले बार्सिलोनासँग साढे दुई वर्षका लागि सम्झौता गरेका छन्।</p>
<p>जितसँगै बार्सिलोना पून: शीर्ष स्थानमा उक्लिएको छ।</p>
<p>रियाल मड्रिडसँग समान ४३ अंक भए पनि बार्सिलोना गोलअन्तरमा अगाडि भएको हो।</p>
<p>त्यसअघि मेसी र ग्रिज्मानसँगै अग्रपंक्तिमा स्थान बनाएका अंशु फातीले शुरूमै पाएको अवसर सदुपयोग गर्न सकेनन्।</p>
<p>दोस्रोमा मेसीले हानेको प्रहार थोरैले बाहिरिएको थियो। ग्रानाडाको अधिकांस समय आफ्नो पोष्ट रक्षा गर्नमै बित्यो।</p>
<p>यान इटेकीको एउटा प्रयासले पनि पोष्टको दिशा लिन सकेन।</p>
<p>बार्सिलोनाले अब ८ माघमा कोपा डेल रेको क्वार्टरफाइनलमा युडी आइबिजाविरुद्ध खेल्नेछ।</p>
प्रतिक्रिया दिनुहोस्
.jpg)
