डेब्यूमा हालान्डको ह्याट्रिक
<p>काठमाडौं। इर्लिङ ब्राउट हालान्डले डेब्यू खेलमा ह्याट्रिक गरेपछि बोरुसिया डर्टमण्डले गएराती जर्मन बुन्डेसलिगामा औसबर्गलाई ५-३ ले पराजित गरेको छ।</p>
<p>१९ वर्षे हालान्ड गत महीनामात्र रेडबुल साल्जबर्गबाट एक करोड ७१ लाख पाउण्डमा डर्टमण्डसँग अनुबन्ध भएका थिए।</p>
<p>उनले साल्जबर्गमा पनि जारी सिजन २२ खेलमा २८ गोल गरिसकेका थिए। उनले नयाँ क्लब र लिगमा पनि आफ्नो प्रभाव छाड्न सफल भएका छन्।</p>
<p>हालान्डले मैदान छिरेको २३ मिनेटमै ह्याट्रिक गरेका थिए। हालान्ड ५६औं मिनेटमा मैदान छिर्दा डर्टमण्ड ३-१ ले पछाडी थियो।</p>
<p>तर, उनले मैदान छिरेको तीन मिनेटमै गोल गरे। ७०औं मिनेटमा दोस्रो गोल गरेका हालान्डले ७९औं मिनेटमा ह्याट्रिक पुरा गरेका थिए।</p>
<p>त्यसअघि डर्टमण्डका लागि जाडोन सान्चो र युलियन ब्रान्डटले गोल गरेका थिए।</p>
<p>साल्जबर्गका लागि फ्लोरियन नाइडरलेचनरले दुई तथा मार्को रिचटरले एक गोल गरेका थिए।</p>
<p>"थाहा छैन किन, मलाई एकदम आनन्द लागेको छ", हालान्डले भने, "म राम्रो क्लबमा राम्रो सहयात्रीहरुको माझमा छु। म यहाँ गोल गर्न आएको हुँ र आज मेरो डेब्यू सुखद बन्यो।"</p>
<p>च्याम्पियन्स लिगको समूह चरणमा आठ गोल गरेपछि हालान्डलाई इटालियन महारथी युभेन्टस र इङ्लिस क्लब म्यानचेस्टर युनाइटेडले अनुबन्ध गर्ने चाहना देखाएको थियो।</p>
<p>जितसँगै १८ खेलबाट ३३ अंक जोडेको डर्टमण्ड चौथो स्थानमा छ।</p>
<p>जुन शीर्ष स्थानको आरबी लिपजिगभन्दा सात तथा दोस्रो स्थानको मोन्चेनग्लाडवाचभन्दा दुई अंकले पछाडी हो।</p>
<p>मोन्चेनग्लाडवाच गएराति साल्केसँग २-० ले पराजित भएको थियो।</p>
<p>आरबी लिपजिगले युनियन बर्लिनलाई ३-१ ले हराएको थियो।</p>
<p>लिपजिगको जितमा टिमो वेर्नरले दुई गोल गरे भने मार्सेल साबिट्जरले एक गोल गरे।</p>
<p>फ्रेइबर्गले मेन्ज ०५ लाई तथा फ्रांकफर्टले होफिनहेइमलाई समान २-१ को अन्तरमा पराजित गरेको थियो।</p>
प्रतिक्रिया दिनुहोस्
.jpg)
