दश मिनेट सम्हालिन नसक्दा बार्सिलोना बाहिरियो
<p>काठमाडौं। एन्जेल कोरेराले अन्तिम समयमा गरेको गोलमा एट्लेटिको मड्रिडले गएराति बार्सिलोनालाई ३-२ ले हराउँदै स्पेनिस सुपर कपको फाइनलमा स्थान बनाएको छ।</p>
<p>गत सिजनको उपविजेता बार्सिलोनाले २-१ को अग्रता लिए पनि अन्तिम दश मिनेट सम्हालिन नसक्दा प्रतियोगिताबाट बाहिरिएको छ। </p>
<p>कोकेले दोस्रो हाफको शुरूमै गरेको गोलबाट एट्लेटिकोले अग्रता लिएको थियो।</p>
<p>त्यसको पाँच मिनेट नवित्दै लियोनल मेसीले बराबरी गोल फर्काए।</p>
<p>५९औं मिनेटमा मेसीले अर्को गोल थपे। तर उनको गोललाई भिडियो सहायक रेफ्रीले गोलको मान्यता दिएन।</p>
<p>६२औं मिनेटमा एन्टोइन ग्रिजम्यानले गरेको गोलमा बार्सिलोनाले अग्रता लियो। तर अन्तिम दश मिनेट सम्हालिन नसक्दा बार्सिलोना प्रतियोगिताबाट बाहिरियो।</p>
<p>७४ मिनेटमा जेरार्ड पिकेले अर्टुरो भिडालको क्रसमा गरेको गोल पनि भिडियो सहायक रेफ्रीले अफसाइड घोषित गरिदिए।</p>
<p>८१औं मिनेटमा अल्भारो मोराटाले पेनाल्टीमा बराबरी गोल फर्काए।</p>
<p>एट्लेटिकोका भिटोलोलाई बार्सिलोनाका गोलकिपर नेटोले फाउल गरेपछि पेनाल्टी पाएको थियो।</p>
<p>खेल सकिन चार मिनेट बाँकी रहँदा मोराटाकै पासमा कोरेराले गरेको गोलमा एट्लेटिकोले फाइनलको यात्रा तय गर्यो।</p>
<p>एट्लेटिको अब आइतबार शहरी प्रतिद्धन्द्धी रियाल मड्रिडसँग उपाधिका लागि प्रतिस्पर्धा गर्नेछ। रियालले बुधबार राती साविक विजेता भ्यालेन्सियालाई ३–१ ले पराजित गर्दै फाइनलमा स्थान बनाएको थियो।</p>
<p>यो सिजन प्रतियोगिताको स्वरूपमा परिवर्तन गरिएको छ।</p>
<p>ला लिगाको शीर्ष दुई क्लब र कोपा डेल रेको फाइनल खेल्ने दुई क्लबले यस प्रतियोगतामा प्रतिस्पर्धा गर्नेछन्।</p>
<p>यसअघि ला लिगा र कोपा डेल रेको विजेताले सिधै उपाधिका लागि प्रतिस्पर्धा गर्थे।</p>
<p>रियालले गत सिजन ला लिगाको तेस्रो स्थान रहेको थियो।</p>
<p>तर, बार्सिलाना ला लिगाको शीर्ष स्थानमा रहनुको साथै कोपा डेल रेको उपविजेता भएका कारण रियालले मौका पाएको हो।</p>
प्रतिक्रिया दिनुहोस्
.jpg)
