इहेनाचोको गोलले लेस्टर हारबाट जोगियो
<p> </p>
<p>काठमाडौं। बैकल्पिक खेलाडी केलेची इहेनाचोको गोलमा लेस्टर सिटीले गएराति काराबाओ कपको सेमिफाइनलमा एस्टन भिल्लासँग १-१ को बराबरी खेलेको छ।</p>
<p>किंग पावर रंगशालामा बैकल्पिक खेलाडी इहेनाचोले खेल सकिन १६ मिनेट बाँकी रहँदा जेमी भार्डेको पासलाई नियन्त्रणमा लिदै विपक्षी दुई रक्षकको बीचबाट हानेको प्रहार गोलमा परिणत भएको थियो।</p>
<p>इहेनाचो ६९औं मिनेटमा एयोजी परेजको स्थानमा मैदान छिरेका थिए। मैदान छिरेको पाँच मिनेट वित्‍न नपाउँदै उनले आफ्नो प्रभाव छाडेका थिए।</p>
<p>नियमित गोलकिपर टोम हिटोन र फरवार्ड वेस्ले घाइते भएपछि एस्टन भिल्ला जितका लागि संघर्ष गरिरहेको छ।</p>
<p>तथापी २८औं मिनेटमा फ्रेडेरिक गुइलबर्टले अनवार इल-घाजीको क्रसमा गोल गर्दै एस्टन भिल्लालाई अग्रता दिएका थिए।</p>
<p>इज्री कोन्साको हेड बारमा लागेर फर्किएपछि एस्टन भिल्लाले अग्रता बढाउने मौका गुमायो।</p>
<p>त्यस्तै जेम्स म्याडिसन र भार्डेको प्रहारलाई एस्टन भिल्लाका गोलकिपर ओर्जन नेल्यान्डले बचाइदिएपछि घरेलु टोली लेस्टर दबाबमा परेको थियो।</p>
<p>दोस्रो लेग भिल्ला पार्कमा २८ जनवरीमा हुनेछ।</p>
प्रतिक्रिया दिनुहोस्
.jpg)
