आर्सनल प्रशिक्षक आर्टेटा रिसाएपछि
<p>काठमाडौं। मध्यान्तरमा मुख्य प्रशिक्षक मिकेल आर्टेटाले खेलाडीलाई गाली गरेपछि आर्सनलले गएराति सम्पन्न एफए कपमा लिड्स युनाइटेडलाई १-० ले पराजित गर्दै चौथो चरणमा स्थान बनाउन सफल भएको छ।</p>
<p>पहिलो हाफमा लिड्सले खेल नियन्त्रणमा राखेको थियो। भ्रमणकारी लिड्सले पहिलो हाफमा १५ पटक गोलका लागि प्रयास गरेको थियो।</p>
<p>त्यसमध्ये प्याट्रिक बामफोर्डको प्रहार क्रसबारमा लागेर फर्किएको थियो भने आर्सनलका गोलकिपर इमिलियानो मार्टिनेजले निकै व्यस्त बनेका थिए।</p>
<p>मार्टिनेज केही सुन्दर बचाए पनि गरे।</p>
<p>दोस्रो हाफमा सुधारिएको प्रदर्शन गरेको आर्सनलले ५५औं मिनेटमा रेइस नेल्सनको गोलमा अग्रता लियो।</p>
<p>नेल्सनको त्यही गोल आर्सनलको जितमा निर्णायक बन्यो।</p>
<p>आर्सनलका गोलकिपर मार्टिनेजले प्रशिक्षक आर्टेटा साच्चिकै धेरै रिसाएको बताए।</p>
<p>त्यस्तै फरवार्ड एलेसान्द्रे लाकाजेटले भने, ‘प्रशिक्षकले धेरै गाली गरे। उनी खुशी थिएनन्।</p>
<p>किनकी लिड्सले यहाँ त्यस्तो राम्रो खेलेको थियो र हामीले उनीहरूलाई रोक्न सकेका थिएनौं।’</p>
<p>आर्सनलले अब चौथो चरणमा बर्नमाउथको भ्रमण गर्नेछ। प्रशिक्षक आर्टेटाले यो खेलबाट खेलाडीले धेरै कुरा सिकेको बताए।</p>
<p>"अहिले म धेरै खुशी छु। हामीले दुई फरक टिम देख्यौं। पहिलो ३० मिनेटसम्म एउटा टिम र त्यसपछिको टिम," पहिलो हाफको प्रदर्शनबारे आर्सनल प्रशिक्षक आर्टेटाले भने, "म उनीहरूलाई खेलको अवस्थाबारे भनिरहेको थिए। मध्यान्तरमा हामीले टिमको मनोवृत्ती, चाहना र संगठनमा परिवर्तन गर्यो र दोस्रो हाफमा नतिजा निस्कियो।"</p>
<p>नयाँ वर्षको खेल तालिकामा आर्सनलले म्यानचेस्टर युनाइटेडलाई २-० ले पराजित गरेपछि लिड्सविरुद्ध खेलेको हो।</p>
<p>तर, १३ पटक एफए कपको उपाधि जितिसकेको आर्सनलले लिड्सविरुद्ध पहिलो हाफमा ३७.२ प्रतिसत मात्र बल पोसेसन राख्न सकेको थियो।</p>
प्रतिक्रिया दिनुहोस्
.jpg)
