इब्राहिमोभिच खेलेको दिन मिलान बराबरीमा रोकियो
<p>काठमाडौं। ज्लाटन इब्राहिमोभिच बैकल्पिक खेलाडीका रूपमा मैदान छिरेको खेलमा एसी मिलानले गएराति इटालियन सिरी ‘ए’ मा साम्पडोरियासँग गोलरहित बराबरी खेलेको छ।</p>
<p>स्विडेनका ३८ वर्षे फरवार्ड इब्राहिमोभिच ५५औं मिनेटमा क्रेजटोफ पिएटेकको स्थानमा मैदान छिरेका थिए।</p>
<p>२०१०-११ को सिजन मिलानलाई सिरी ‘ए’ को उपाधि जिताएका इब्राहिमोभिचले गोलका दुई राम्रो अवसर पाएका थिए।</p>
<p>तर, उनको एउटा प्रहार साम्पडोरियाका रक्षकले गोल लाइनबाट बचाएका थिए। अर्को प्रहार इमिल औडेरोले बचाइदिएका थिए।</p>
<p>इब्राहिमोभिचले इन्टर मिलान, युभेन्टस र एसी मिलानमा गरी १२२ गोल गरिसकेका छन् भने ६ सिरी ‘ए’ उपाधि जितिसकेका छन्।</p>
<p>बराबरीसँगै मिलान २२ अंकका साथ १२औं स्थानमा छ। १६ अंक जोडेको साम्पडोरिया १६औं स्थानमा छ।</p>
<p>गएराति नै सम्पन्न अन्य खेलमा टोरिनोले रोमालाई २-० ले पराजित गर्‍यो भने एटलान्टाले पार्माविरुद्ध ५-० को सहज जित हासिल गर्‍यो।</p>
<p>बोलोग्ना र फियोरेन्टिनाले १–१ को बराबरी खेले भने युडिनेसले लेसेलाई १-० ले पराजित गर्‍यो।</p>
प्रतिक्रिया दिनुहोस्
.jpg)
