पीपीएल: बुटवललाई हराउँदै विराटनगर फाइनलमा, उपाधिका लागि चितवनसँग भिड्ने
<p>काठमाडौं। बुटवल ब्लास्टरलाई लगातार दोस्रो खेलमा पराजित गर्दै विराटनगरले आज पोखरा प्रिमियर लिगको फाइनलमा स्थान बनाएको छ। विराटनगरले बुटवललाई २२ रनले पराजित गर्दै फाइनलमा चितवन राइनोजसँगको भिडन्त पक्का गरेको हो।</p>
<p>ट्वान्टी– २० क्रिकेटमा १९औं ओभर महत्वपूर्ण हुन्छ। आज विराटनगरविरुद्ध बुटवललाई जित्नका लागि १२ बलमा २६ रन आवश्यक थियो। तर जितेन्द्र मुखियाले १९औं ओभरमा कुनै रन नदिएपछि विराटनगर जित नजिक पुगेको थियो। </p>
<p>बुटवललाई ६ बलमा २६ रन आवश्यक पर्‍यो। अन्तिम ओभरमा पुनित मेहराले ४ रन दिएर ३ विकेट लिएपछि विराटनगरले बुटवललाई २२ रनले हराउँदै फाइनलमा स्थान बनाएको हो। </p>
<p>विराटनगरले लिगको अन्तिम खेलमा पनि बुटवल ब्लास्टरलाई ४ विकेटले हराउँदै रनरेटका आधरमा इलिमिनेटरमा स्थान बनाएको थियो। विराटनगरले अब १२ पुसमा फाइनलमा उपाधिका लागि चिवतन रानोजविरुद्ध प्रतिस्पर्धा गर्नेछ। </p>
<p>१६६ रनको लक्ष्य पछ्याएको बुटवलले निर्धारित २० ओभरमा १४४ रन जोड्दा सबै विकेट गुमायो। बुटवलका ओपनर अफ्ताबुद्धिन अहमदले ४३, भिम सार्कीले ४४, पुरन बिकले १५ र शिभम सिंहले १४ रन बनाउनुबाहेक अन्यले दोहोरो अंकमा रन बनाउन सकेनन्। </p>
<p>विराटनगरका मेहरा र शाहब आलमले समान ३ विकेट लिँदा किशोर महतो, जितेन्द्र मुखिया, मुहम्मद जाइद अलामको नाममा १–१ विकेट लिए।</p>
<p>त्यसअघि ओपनर सुनिल धमलाको अर्धशतकप्रेरित विराटनगरले पोखरा रंगशालास्थित क्रिकेट मैदानमा ५ विकेट गुमाएर १६५ रन जोडेको थियो। </p>
<p>टस हारेर ब्याटिङ थालेको विराटनगरका लागि सुनिल धमनाले ६१ रन जोडे। सुनिलले ५४ बलमा ६ चौका र २ छक्का प्रहार गरे। कप्तान प्रदीप ऐरीले अविजित ३३ रन जोडे। मुहम्मद जाइद अलामले २० रन बनाउँदा पुनित मेहरा र लोकेश बमले समान १९ रन जोडे। मिनष थापा २ रनमा अविजित रहे। </p>
<p>बुटवलका हर्ष टोन्कले २ विकेट लिँदा ललितसिंह भण्डारी र अभिनाष बोहराले १–१ विकेट लिए।</p>
प्रतिक्रिया दिनुहोस्
.jpg)
