चितवनको अपराजित यात्रा कायमै
<p>काठमाडौं। चितवन राइनोजले पोखरा प्रिमियर लिगमा अपराजित यात्रालाई चौथो खेलमा पनि कायम राख्दै फाइनलमा सम्भावना बलियो बनाएको छ। </p>
<p>चितवनले आज पोखरा रंगशलाको क्रिकेट मैदानमा विराटनगर टाइटन्सलाई १८ रनले पराजित गरेको हो। </p>
<p>चितवन लिग चरणमा अब दोस्रो स्थानको काठमाडौं गोल्डेन्सविरुद्ध खेल्न बाँकी छ। </p>
<p>चितवन ४ खेलबाट ८ अंक जोड्दै शीर्ष स्थानमा छ। दोस्रो स्थानको काठमाडौं गोल्डेन्सले ४ अंक जोडेको छ। तीन खेलबाट ४ अंक जोडेको बुटवल तेस्रो स्थानमा छ। </p>
<p>बुटवल अब विराटनगर र धनगढी ब्लुजसँग खेल्न बाँकी छ। चितवन काठमाडौंसँग पराजित भयो र बुटबलले बाँकी दुबै खेल जिते चितवनसँग अंक बराबर गर्नेछ। </p>
<p>चितवनले काठमाडौंलाई हराए सिधै फाइनलमा स्थान बनाउनेछ। </p>
<p>विराटनगरका कप्तान प्रदीप ऐरीले टस जितेर चितवनलाई ब्याटिङको निम्तो दिएका थिए। </p>
<p>चितवनले निर्धारित २० ओभरमा ४ विकेट गुमाएर १४६ रन बनायो। १४७ रनको लक्ष्य पछ्याएको विराटनगरले १२८ रन जोड्दा सबै विकेट गुमायो। </p>
<p>विराटनगरका लोकेश बमले ६२ रन जोडे पनि टोलीलाई जिताउन सकेनन्। </p>
<p>लोकेशबाहेक पुनित मेहेराले २४ र नोमन खानले १८ रन जोड्नुबाहेक अन्यले दोहोरो अंकमा रन बनाउन सकेनन्। </p>
<p>चितवनका करण केसी र भुवन कार्कीले समान ३ विकेट लिए। रोहन मुस्तफाले २ तथा सन्नी पटेलले १ विकेट लिए। </p>
<p>त्यसअघि ब्याटिङतर्फ चितवनका लागि आरिफ शेखले सबभन्दा धेरै अविजित ३९ रन बनाए। उनले सन्नी पटेलसँग अविजित ५४ रनको साझेदारी गरे। </p>
<p>सन्नी २७ रनमा अविजित रहे। कप्तान पारस खड्काले ३५ र बाबर हायतले २५ रन जोडे। </p>
<p>पारस र बाबरले दोस्रो विकेटका लागि ४७ रनको साझेदारी गरेका थिए। </p>
<p>रोहन मुस्तफा ७ र अनिलकुमार शाह ३ रनमा आउट भए। </p>
<p>विराटनगरका जितेन्द्र मुखिया, किशोर महतो, पुनित मेहेरा र मुहम्मद जाइद आलमले १/१ विकेट लिए। </p>
<p>चितवनले यसअघि पोखरा पल्टनलाई ६ विकेट, बुटबल ब्लास्टरलाई ११९ र धनगढी ब्लुजलाई ५२ रनले पराजित गरेको थियो। </p>
<p>विराटनगरले भने १ खेलमात्र जितेको छ।</p>
प्रतिक्रिया दिनुहोस्
.jpg)
