लिभरपुललाई क्लब विश्वकपको उपाधि
<p>काठमाडौं। रोबर्टो फिर्मिनोले थप गरिएको समयमा गरेको गोलमा लिभरपुलले गएराति ब्राजिलियन क्लब फ्लामेन्गोलाई १-० ले पराजित गर्दै फिफा क्लब विश्वकपको उपाधि जितेको छ। </p>
<p>लिभरपुलले क्लब विश्वकपको उपाधि जितेको यो पहिलो हो। </p>
<p>फिर्मिनोले अन्तिम समयमा गरेको गोलमै लिभरपुलले मेक्सिकोको क्लब मोन्टेर्रेलाई २–१ ले पराजित गर्दै फाइनल भिडन्त पक्का गरेको थियो। </p>
<p>कतारको दोहास्थित खालिफा अन्तर्राष्ट्रिय रंगशालामा सम्पन्न फाइनलमा पनि फिर्मिनोले ९९औं मिनेटमा गरेको निर्णायक गोलमा लिभरपुलले उपाधि पक्का गर्‍यो।</p>
<p>“खेलाडीको प्रशंसा गर्न मैले शब्द नै भेटाउन सकेको छैन। यो अद्भुत क्षण हो”, लिभरपुलका प्रशिक्षक योर्गान क्लोपले भने, “हामी राम्रो टोली हो र जितका हकदार थियौं। हामीले राम्रो खेल्न सकेनौं। तर, जितका लागि यही नै पर्याप्त बन्यो। खेलाडीको प्रदर्शनमा मलाई गर्व छ। क्लबका लागि विशेष दिन हो। म साच्चिकै खुशी छु।”</p>
<p>क्लब विश्वकपको फाइनल थप समयमा गएको यो चौथो पटक हो।</p>
<p>यसअघि सन् २०००, २००९ र २०१६ को फाइनलको नतिजा पनि थपिएको समयमा आएको थियो। पछिल्लो १३ मध्ये १२ उपाधि युरोपियन क्लबले जितेका छन्। </p>
<p>यससँगै लिभरपुल क्लब विश्वकपको उपाधि जित्ने दोस्रो इङ्लिस क्लब बनेको छ। </p>
<p>यसअघि २००८ मा म्यानचेस्टर युनाइटेडले क्लब विश्वकपको उपाधि जितेको थियो। </p>
<p>मोन्टेर्रेले साउदी अरेवियाको क्लब अल हिलाललाई टाइब्रेकरमा ४–३ ले पराजित गर्दे तेस्रो स्थान पक्का गर्‍यो।</p>
<p>मोन्टेर्रेले निर्धारित समय २–२ को बराबरी खेलेको थियो। </p>
प्रतिक्रिया दिनुहोस्
.jpg)
