२०१९ मा मेसीको पचासौं गोल
<p><br />
काठमाडौं। लियोनल मेसीले यो वर्ष ५०औं गोल गरेको दिन बार्सिलोनाले गएराति डेपोर्टिभो अलाभेसमाथि ४–१ को सहज नतिजा निकालेको छ। </p>
<p>यससँगै बार्सिलोनाले घरेलु मैदानमा अपराजित रहदै २०१९ को अन्त्य गर्‍यो।</p>
<p>लुइस स्वारेजले तीन गोलमा अवसर सिर्जना गरे भने एक गोल आफैले पेनाल्टीमा गरे।</p>
<p>एन्टोइन ग्रिजम्यानको गोलमा बार्सिलोनाले १४औं मिनेटमा अग्रता लियो। पहिलो हाफको अन्तिममा अर्टुरो भिडालले घरेलु टोलीको अग्रता दोब्बर बनाए। </p>
<p>दोस्रो हाफमा अलाभेसले सुधारिएको प्रदर्शन गर्‍यो। दोस्रो हाफमा शुरूको २० मिनेट बार्सिलोनामाथि दबाब सिर्जना गरेको अलाभेसले पेरे पोन्सको गोलबाट पूनरागमनको संकेत गरेको थियो। </p>
<p>तर मेसीले २५ यार्डबाट उत्कृष्ट गोल गरेपछि अलाभेस निरिह बनेको थियो। लगत्तै स्वारेजले पेनाल्टीमा अर्को थपेपछि बार्सिलोना सहज जित सफल भयो। </p>
<p>नोउ क्याम्पमा बार्सिलोनाले २४ जित र ४ बराबरीसँगै २०१९ को अन्त्य गर्‍यो। २०११ पछि घरेलु मैदानमा अपराजित रहेको यो पहिलो वर्ष हो। </p>
<p>जितसँगै बार्सिलोनाले शीर्ष स्थानमा ३ अंकको स्पष्ट अग्रता बनाएको छ। बार्सिलोनाले १८ खेलमा ३९ अंक जोडेको छ भने दोस्रो स्थानको रियाल मड्रिडको ३६ अंक छ। </p>
<p>तथापी रियालले एक खेल कम खेलेको छ। आइतबार रियालले एथलेटिको विल्बाओलाई ६ गोलको अन्तरमा पराजित गरे बार्सिलाना दोस्रो स्थानमा झर्नेछ। </p>
<p>अर्जेन्टिनाका फरवार्ड मेसीले देश र क्लबबाट ५० गोल पुरा गर्नुअघि गरेको गोल रेफ्रीले मान्यता दिएनन्। </p>
<p>उनले विगतका १० मध्ये ९ वर्ष ५० गोल पुरा गरेका थिए। २०१९ मा मेसी युरोपको सबभन्दा धेरै गोल गर्ने खेलाडी बने। उनले ३२ ला लिगा खेलमा ३४ गोल गरे। </p>
<p>बार्सिलोनाको अपारजित यात्रा ११ खेलसम्म कायमै छ। अलाभेस भने पछिल्लो ५ खेलमा जित निकाल्न असफल रह्यो। </p>
<p>गएराति नै सेभियाले मालोर्कालाई २–० ले हराउँदा इबरले ग्रानाडामाथि ३–० को विजय हासिल गर्‍यो भने भिल्लारियलले गेटाफेलाई १–० ले पराजित गरेको छ।</p>
<p><br />
</p>
प्रतिक्रिया दिनुहोस्
.jpg)
