सिटीको जितमा जिससको ह्याट्रिक
<p>काठमाडौं। गाब्रियल जिससको ह्याट्रिकप्रेरित म्यानचेस्टर सिटीले गएराति डाइनामो जाग्रबलाई ४-१ ले पराजित गरेको छ। </p>
<p>यसअघि नै च्याम्पियन्स लिगको अन्तिम १६ मा स्थान पक्का गरिसकेको सिटी यो जितसँगै समूह ‘सी’मा अपराजित रह्यो। </p>
<p>सर्जियो अग्विरो घाइतेपछि पहिलो रोजाईमा परेका जिससले ३४औं मिनेटमा सिटीका लागि बराबरी गोल गरेका थिए। </p>
<p>त्यसअघि ड्यानिल ओल्मोको गोलमा जाग्रबले दश मिनेट नवित्दै अग्रता लिएको थियो। </p>
<p>५०औं मिनेटमा दोस्रो गोल गरेका जिससले ५४औं मिनेटमा ह्याट्रिक पूरा गरे।</p>
<p>सिटीका लागि खेल सकिन ६ मिनेट बाँकी छँदा फिल फोडानले अर्को गोल गरे। </p>
<p>‘टोलीको जितमा गोल गर्न पाउँद म धेरै खुशी छु। म यतिमै रोकिनु हुदैन। अझ धेरै गोल गर्नुछ,’ ह्याट्रिकपछि जिससले भने। </p>
<p>समूह ‘सी’ बाट सिटीसँगै एटलान्टा उपविजेता बन्दै अन्तिम १६मा प्रवेश गर्‍यो।</p>
<p>अन्तिम १६ मा स्थान बनाउन जित्नै पर्ने दबाबमा रहेको एटलान्टाले गएराति युक्रेन भ्रमणमा सनसनीपूर्ण नतिजा निकाल्यो। </p>
<p>युक्रेनी क्लब साख्तर डोनेस्कलाई बराबरी गरेमात्र पुग्थ्यो। तर, घरेलु मैदानमा साख्तर डोनेस्कले अंक बाड्न सकेन। </p>
<p>पाहुना टोली एटलान्टाले ३-० को नतिजा निकाल्दै अन्तिम १६ मा स्थान बनायो। </p>
<p>समूह चरणका सबै खेल सकिँदा एटलान्टाको ७ अंक थियो भने साख्तर डोनेस्कको ६ अंक थियो। जाग्रबले ५ अंक जाडेको थियो। </p>
<p>इटालियन क्लब एटलान्टाको जितमा टिमोथी कास्टेग्नी, मारियो पासालिक, रोबिन गोसेन्सले १/१ गोल गरे।</p>
प्रतिक्रिया दिनुहोस्
.jpg)
