वेस्ट इन्डिजद्वारा अफगानिस्तान ९ विकेटले पराजित
<p>काठमाडौं। रहकीम कर्नवालको १० विकेट तथा शमाह ब्रुक्सको शतकीय इनिङप्रेरित वेस्ट इन्डिजले आज अफगानिस्तानविरुद्धको टेस्ट क्रिकेट ९ विकेटले जितेको छ।</p>
<p>लखनउस्थित अटल विहारी बाजपेयी क्रिकेट रंगशालामा टस हारेर ब्याटिङ थालेको अफगानिस्तानले पहिलो इनिङमा सबै विकेट गुमाएर १८७ रन बनाएको थियो।</p>
<p>२५.३ ओभर बलिङ गरेका कर्नवालले ७५ रन दिएर सात विकेट लिएका थिए।</p>
<p>कर्नवाललाई जसोन होल्डरले दुई र जोमल वारिक्यानले एक विकेट लिएर सघाएका थिए।</p>
<p>पहिलो इनिङमा अफगानिस्तानका जाभेद अहमादीले सबभन्दा धेरै ३९ रन बनाए।</p>
<p>अमिर हमजाले ३४, अफसर जजाईले ३२, इसानुल्लाहले २४ रन बनाउनुबाहेक अफगानिस्तानका अन्य ब्याट्सम्यानले उल्लेख्य प्रदर्शन गर्न सकेनन्।</p>
<p>ब्रुक्सले करियरको तेस्रो टेस्टमा पहिलो शतक पूरा गरेपछि वेस्ट इन्डिजले पहिलो इनिङमा सबै विकेट गुमाएर दुई सय ७७ रन बनाएको थियो।</p>
<p>ब्रुक्सबाहेक वेस्ट इन्डिजका जोन क्याम्पबेलले ५५ तथा शान डोरिचले ४२ रन बनाए।</p>
<p>पहिलो इनिङमा अफगानिस्तानका हमजाले पाँच विकेट लिए। रिसद खानले तीन तथा जाहिर खानले दुई विकेट लिए।</p>
<p>दोस्रो इनिङमा कर्नवालले थप तीन विकेट लिए।</p>
<p>यससँगै उनले १० विकेट पूरा गरे।</p>
<p>कर्नवालले टेस्ट क्रिकेटमा १० विकेट लिएको यो पहिलो पटक हो।</p>
<p>कर्नवालबाहेक जसोन होल्डर र रोस्टन चेजले पनि समान तीन विकेट लिएपछि अफगानिस्तानले १२० रन जोड्दा सबै विकेट गुमायो।</p>
<p>त्यसपछि ३१ रनको लक्ष्य वेष्ट इन्डिजले एक विकेट गुमाएर पूरा गर्‍यो।</p>
<p>यसअघि तीन खेलको एकदिवसीय अन्तर्राष्ट्रिय शृंखला क्लिनस्विप गरेको वेस्ट इन्डिजले तीन खेलको ट्वान्टी–२० अन्तर्राष्ट्रिय शृंखला भने २–१ ले गुमाएको थियो। </p>
<p>भारत भ्रमणमा रहेको वेस्ट इन्डिजले अब घरेलु टोलीसँग तीन खेलको एकदिवसीय अन्तर्राष्ट्रिय शृंखला खेल्नेछ।</p>
<p> </p>
प्रतिक्रिया दिनुहोस्
.jpg)
