साउथह्याम्टनसँग हार्यो लिग लिडर एभर्टन
<p>एजेन्सी। गए राति साउथह्याम्टनसँग २-० ले पराजित भएसँगै एभर्टनको इङ्लिस प्रिमियर लिगमा अपराजित यात्रामा पूर्णविराम लागेको छ।</p>
<p>यसअघिका ५ खेलमा ४ जित र १ बराबरीसहित अंक तालिकाको शीर्ष स्थानमा रहेको एभर्टनले छैठौं खेलमा पराजय भोगेको हो।</p>
<p>साउथह्याम्टनको मैदानमा भएको खेलको २७औं मिनेटमा जेम्स वार्ड प्राउजले गरेको गोलसँगै भ्रमणकारी एभर्टन १-० ले पछि परेको थियो।</p>
<p>त्यसको ८ मिनेट नबित्दै चे आडम्सले गोल गर्दै घरेलु टोलीको अग्रता दोब्बर पारेका थिए।</p>
<p>पहिलो हाफमा २-० ले पछि परेको एभर्टनका लेफ्ट ब्याक लुकास डिएनले रातो कार्डको सामना गरेपछि कार्लो एन्सेलोटीको टीम १० जनामा सीमित भएको थियो।</p>
<p>बाँकी समयमा रक्षापंक्तिमा सुधार गरे पनि गोल गर्न नसक्दा एभर्टनले पराजित हुनुपर्‍यो।</p>
<p>जितसँगै ६ खेलबाट १० अंक जोडेको साउथह्याम्टन तालिकाको छैठौं स्थानमा उक्लिएको छ।</p>
<p>समान खेलबाट १३ अंकसहित एभर्टन शीर्ष स्थानमा छ।</p>
प्रतिक्रिया दिनुहोस्
.jpg)
