किन र एम्बाप्पेको गोलमा पीएसजीको पुनरागमन
<p>काठमाडाैं। मोसे किनले पेरिस सेन्ट जर्मन (पीएसजी) का लागि व्यक्तिगत गोलको खाता खोलेको दिन फ्रान्सेली लिग वानको साबिक विजेताले च्याम्पियन्स लिगमा भोगेको हारको पीडामा मलम लगाउने क्रममा गएराति डिजोनमाथि ४-० को जित हासिल गरेको छ। </p>
<p>गत सिजन च्याम्पियन्स लिगको फाइनल पुगेको पीएसजी यसपालि मंगलबार पहिलो खेलमै म्यानचेस्टर युनाइटेडसँग आफ्नै घरमा पराजित भएको थियो।</p>
<p>च्याम्पियन्स लिगको त्यो हारको पीडालाई पन्छाउने क्रममा टोलीले गएराति घरेलु लिगमा पुछारको टोलीमाथि सहज जित हासिल गर्‍याे। </p>
<p>एभर्टनबाट लोनमा आएका किनले पीएसजीका लागि खाता खोलेको दिन नै दुई गोल गरे। तेस्रो मिनेटमा खाता खोलेका किनले २३औं मिनेटमा पीएसजीको अग्रता दोब्बर पारे। </p>
<p>बेन्चबाट खेल सुरु गरेका सुपरस्टार किलियन एमबाप्पेले पीएसजीका लागि अन्तिम समयमा दुई गोल थपे। एमबाप्पेले ८२ र ८८औं मिनेटमा गोल गरेका थिए। </p>
<p>लिग वानमा गए राति नै भएका अन्य खेलमा एङगर्सले रेनेसलाई २-१ तथा मार्सेले लोरियन्टलाई १-० को नतिजामा पराजित गरे।<em> एजेन्सी।</em></p>
प्रतिक्रिया दिनुहोस्
.jpg)
