अग्रता जोगाउन नसक्दा ब्राइटनसँग बराबरीमा रोकियो क्रिस्टल प्यालेस
<p>एजेन्सी। पहिलो हाफमा लिएको १-० को अग्रता जोगाउन नसक्दा क्रिस्टल प्यालेस इङ्लिस प्रिमियर लिगमा ब्राइटन एन्ड होभ अल्बियनसँग १-१ गोलको बराबरीमा रोकिएको छ।</p>
<p>प्यालेसको मैदानमा भएको खेलको १८औं मिनेटमा भ्रमणकारी ब्राइटनका ताेरक ल्याम्प्टीले घरेलु टोलीका मिची बाट्सुवाईमाथि १८ यार्ड बक्समा फाउल गरेपछि पेनाल्टी पाएको थियो।</p>
<p>सोही पेनाल्टीको सदुपयोग गर्दै प्यालेसका स्टार फरवार्ड विलफ्रेड जाहाले घरेलु टोलीलाई अग्रता दिलाएका थिए।</p>
<p>पहिलो हाफमा १-० ले पछि परेको ब्राइटनले ९०औं मिनेटमा एलेक्सिस म्याक अल्लिस्टेरले गरेको गोलमा बराबरी गरेको थियो।</p>
<p>इन्जुरी समयमा प्यालेसका गेरी काहिलमाथि खराब ट्याकल गर्दा ब्राइटनका कप्तान लेविस डन्कले रातो कार्डको सामना गर्दै मैदानबाट बाहिरिनु परेको थियो।</p>
<p>तर, कम समयमा एक खेलाडी कम भएको फाइदा उठाउन नसक्दा क्रिस्टल प्यालेस जारी सिजनको तेस्रो जित निकाल्नबाट वञ्चित रह्यो।</p>
<p>बराबरीसँगै ५ खेलबाट ७ अंक जोडेको प्यालेस तालिकाको १२औं स्थानमा छ भने समान खेलबाट ४ अंकसहित ब्राइटन १६औं स्थानमा छ।</p>
प्रतिक्रिया दिनुहोस्
.jpg)
