एनटीएलाई चार स्वर्ण र तीन रजत
<p>काठमाडौं। नेप्लिज तेक्वान्दो एकेडेमी (एनटीए) का खेलाडीले २०२० वर्ल्ड भर्चुअल तेक्वान्दो महोत्सवमा चार स्वर्ण र तीन रजत गरी सात पदक जितेका छन्।</p>
<p>विजेतामा भिजन तामाङले पुरुष १२ वर्षमा स्वर्ण जिते। उनले ६.७६ अंक जोडेका थिए। यो स्पर्धामा एनटीएबाट २ खेलाडीले सहभागिता जनाएका थिए।</p>
<p>भिजनसंगै समान ६.७६ अंक जोडेपनि महेश आङथुप्पाले दोश्रो स्थानमा चित्त बुझाए। प्रेजेन्टेसनका आधारमा महेश पछि परेका हुन्। प्रेजेन्टेसनमा भिजनले ३.८३ तथा महेशले ३.८० अंक जोडे।</p>
<p>युएस वर्ल्ढ क्लास तेक्वान्दो एसोसिएसनद्वारा आयोजित प्रतियोगिताको पुरुष १५ वर्षमुनि विवेक श्रेष्ठले पहिलो स्थान हात पारे। उनले ६.३० अंक बटुलेका थिए।</p>
<p>सोही स्पर्धाको महिलामा ६.६३ अंकसाथ मेलिना राईले शीर्ष स्थान हात पारिन्। ६.३६ अंकसाथ प्रगति कुइकेल दोश्रो भइन्।<br />
पुरुष १४ वर्षमा ६.०६ अंक जोड्दै प्रजुन कुइकेल पहिलो भए। पुरुष १२-१४ वर्षमा आयुश ढुंगेल दोश्रो भए। उनले ५.९३ अंक ल्याए।</p>
<p>एनटीएबाट ९ खेलाडी सहभागी भएकोमा ७ जनाले पदक जिते भने बाँकी २ पदकविहीन रहे। सबै खेलाडीले पुम्सेको जुनियरतर्फ प्रतिस्पर्धा गरेका थिए।</p>
<p>आयुश बोहरा र प्रशन्न पुडासैनी दुवैले यु-१७ उमेरसमूहमा प्रतिस्पर्धा गरेका थिए। ६.२६ अंकमा प्रशन्न पाँचौं तथा ५.९० अंकमा आयुश छैटौं भए।</p>
<p>प्रतियोगितामा एनटीएका अध्यक्ष समेत रहेका अन्तर्राष्ट्रिय निर्णायक अशोक खड्काले निर्णायकको भूमिका निर्वाह गरेका थिए। अक्टोबर १७ र १८ तारिखमा भएको प्रतियोगितामा एसियाली महादेशबाटै निर्णायकको भूमिका निर्वाह गर्ने खड्का एक्लो निर्णायक भएको बताइएको छ।</p>
<p>प्रतियोगितामा सहभागी एनटीएका सबै खेलाडीको दर्ता शुल्क पान अमेरिकन तेक्वान्दो युनियनका महासचिव रिक्की सिनले प्रायोजन गरेका थिए। प्रतियोगितामा सहभागी हुन एक खेलाडीको दर्ता शुल्क १ सय अमेरिकन डलर राखिएको थियो।</p>
प्रतिक्रिया दिनुहोस्
.jpg)
