मेसीविरुद्ध रोनाल्डो मैदानमा उत्रिनेमा आशङ्का उत्पन्न
<p>एजेन्सी। क्रिस्टियानो रोनाल्डोले कोरोना भाइरसको सङ्क्रमण पुष्टि भएसँगै च्याम्पियन्स लिग अन्तर्गत अर्को हप्ता हुने बार्सिलोनाविरुद्धको खेल गुमाउने शंका बढेको छ।</p>
<p>अन्तर्राष्ट्रिय फुटबलका लागि पोर्चुगलको टोलीसँग रहेका रोनाल्डो नतिजा पोजिटिभ आएसँगै सेल्फ-आइसोलेसनमा बसेका छन्। र, इटालीका क्‍वारेन्टाइन सम्बन्धि नयाँ नियम अनुसार कम्तिमा १० दिन आइसोलेसनमा बस्नुपर्छ।</p>
<p>र, यो नियमका कारण उनले अक्टोबर २९ मा हुने बार्सिलोनाविरुद्धको खेल गुमाउने शंका उत्पन्न भएको छ। वर्तमान फुटबल जगतका दुई महान् खेलाडी हुन्, क्रिस्टियानो रोनाल्डो र बार्सिलोनाका कप्तान लियोनेल मेसी।</p>
<p>रोनाल्डोले २०१८ मा रियाल मड्रिड छोडेसँगै यी दुई खेलाडी आमने-सामने भएका छैनन्। विश्व भरका फुटबल समर्थकलाई दुई भागमा विभाजन गर्ने यी दुई खेलाडी करिब तीन वर्षपछि आमने-सामने हुने भएका थिए।</p>
<p>तर, रोनाल्डोलाई कोरोना सङ्क्रमण पुष्टि भएसँगै समर्थकका लागि चिन्ताको विषय थपिएको छ। </p>
<p>पोर्चुगल फुटबल फेडेरेसन (एफपीएफ)ले ३५ वर्षीय फरवार्डलाई कोरोना भाइरसको सङ्क्रमण परीक्षण गर्दा नतिजा पोजिटिभ आएको घोषणा गरेको थियो।</p>
<p>नतिजा पोजिटिभ आएको भए पनि उनलाई हालसम्म कुनै पनि लक्षण नदेखिएको एफपीएफले बताएको थियो।</p>
<p>पोर्चुगलले बुधबार राति युइएफए नेसन्स लिगको समूह सीअन्तर्गत स्वीडेनको सामना गर्दैछ।</p>
प्रतिक्रिया दिनुहोस्
.jpg)
