इटाली पोल्यान्डसँग बराबरीमा रोकियो, शीर्ष स्थान भने यथावत्
<p>काठमाडौं। यूईएफए नेसन्स लिगमा पोल्यान्डविरुद्ध गोलरहित बराबरी खेलेपछि इटाली समूह एकको शीर्ष स्थानमा कायमै छ।</p>
<p>रोबर्टो मान्चिनीको इटाली प्रतियोगितामा अपराजित यात्रालाई कायमै राख्न सफल भएको छ। बराबरी खेले पनि इटाली पाँच अंकका साथ समूहको शीर्ष स्थानमा छ। पोल्यान्ड चार अंकका साथ तेस्रो स्थानमा छ।</p>
<p>गत साता सम्पन्न मैत्रीपुर्ण खेलमा इटाली र पोल्यान्ड दुवैले फराकिलो जित निकालेका थिए। तर गएराति दुवै टीमका अग्रपंक्तिले विपक्षी रक्षापंक्तिलाई तोड्न सकेनन्। पोल्यान्डका स्टार रोबर्ट लेवनडोवस्कीले विपक्षी पोष्टमा आक्रमण बुन्न असफल रहे।</p>
<p>दोस्रो हाफमा चेल्सीका रक्षक इमर्सन पाल्मिएरीले इटालीका लागि राम्रो अवसर खेर फाले। फेडरिको चिइसाको क्रसमा इमर्सनको हेडिङ थोरैले बाहिरिएको थियो।</p>
<p>समूह एकमै नेदरल्यान्ड र बोस्निया एण्ड हर्जगोभिनाले पनि गोलरहित बराबरी खेले। नेदरल्यान्ड चार अंकका साथ दोस्रो स्थानमा छ भने दुई अंक जोडेको बोस्निया एण्ड हर्जगोभिना पुछारमा छ।</p>
प्रतिक्रिया दिनुहोस्
.jpg)
