तेस्रो खेलमा हैदराबादको पहिलो जित, दिल्ली १५ रनले पराजित
<p>काठमाडौं। रशिद खानको तीन विकेटप्रेरित सनराइजर्स हैदराबादले इन्डियन प्रिमियर लिग (आईपीएल)मा आज दिल्ली क्यापिटल्सलाई १५ रनले पराजित गरेको छ।</p>
<p>अबुधावीस्थित शेख जाइद रंगशालामा टस हारेर पहिले ब्याटिङको निम्तो पाएको हैदराबादले १६२ रनको योगफल तयार पारेको थियो।</p>
<p>१६३ रनको विजय लक्ष्यसहित जवाफी ब्याटिङमा उत्रिएको दिल्लीले निर्धारित २० ओभरमा ७ विकेट गुमाएर १४७ रन मात्र बनाउन सक्यो।</p>
<p>दिल्लीका लागि शिखर धवनले ३४ तथा रिषभ पन्तले २८ सिमरन हेटमेयरले २१ र कागिसो रवाडाले १५ बाहेक अन्य ब्याट्सम्यानले उल्लेख्य प्रदर्शन गर्न सकेनन्।</p>
<p>हैदराबादका लागि ४ ओभरमा मात्र १४ रन खर्चेर रशिद खानले ३ विकेट लिए। त्यस्तै, भुवनेश्वर कुमारले २ तथा खलिल अहमद र नटराजनले १/१ विकेट लिए।</p>
<p>पहिलो इनिङमा हैदराबादका लागि बेयरिस्टोले ४८ बलमा २ चौका र १ छक्कासहित ५३ रनको योगदान गरेका थिए।</p>
<p>त्यस्तै कप्तान डेभिड वार्नरले २२ बलमा ३ चौका र २ छक्कासहित ४५ तथा केन विलियमसनले २६ बलमा ५ चौकासहित ४१ रन जोडेका थिए।</p>
<p>दिल्लीका लागि कागिसो रवाडा र अमित मिश्राले २/२ विकेट लिएका थिए।</p>
<p>हैदराबाद यसअघि पहिलो खेलमा रोयल च्यालेन्जर्स बेङ्ग्लोरसँग १० रन तथा कोलकाता नाइट राइडर्ससँग ७ विकेटले पराजित भएको थियो।</p>
<p>त्यस्तै दिल्लीले पहिलो खेलमा किङ्ग्स इलेभेन पञ्जाबलाई सुपर ओभरमा र दोस्रो खेलमा चेन्नई सुपर किङ्ग्सलाई ४४ रनले पराजित गरेको थियो।</p>
प्रतिक्रिया दिनुहोस्
.jpg)
