स्वारेज एट्लेटिको जाने पक्का!
<p>एजेन्सी। बार्सिलोनाले सहमति जनाएपछि उरुग्वेली स्ट्राइकर लुइस स्वारेज स्पेनिस ला लिगाको प्रतिद्वन्द्वी एट्लेटिको मड्रिड सरुवा हुने भएका छन्।</p>
<p>बार्सिलोनाले पछिल्लो समय स्वारेजलाई क्याम्प नोउमा खास महत्व दिएको थिएन। आफूले राख्न नचाहेका खेलाडीलाई नि:शुल्क सरुवाका लागि बार्सिलोनाले स्वतन्त्र छोडेपछि स्वारेजको मड्रिड सरुवा हुने भएको हो।</p>
<p>एट्लेटिकोअघि स्वारेज इटालियन सिरी ‘ए’ को च्याम्पियन युभेन्टस सरुवाको तयारीमा थिए। तर, पासपोर्टसम्बन्धि समस्याका कारण उनी टुरिन जान पाएका थिएनन्।</p>
<p>युभेन्टस प्रस्थानको प्रयास असफल भएपछि स्वारेजलाई ला लिगाको प्रतिद्वन्द्वी क्लबमा जानबाट बार्सिलोनाका अध्यक्ष जोसेप मारिया बाटोमेउले रोकेका थिए। तर पछि स्वारेजका एजेन्ट र क्लबको व्यवस्थापनबीच सहमति भएपछि उनी स्वतन्त्र भएका हुन्।</p>
<p>स्वारेज र एट्लेटिकोबीच पारिश्रमिकको विषयमा सहमति भइसकेको बताइएको छ। समाचारहरुमा जनाइएअनुसार ३३ वर्षे फरवार्डका लागि क्लबले तिर्ने पारिश्रमिकको आधार मुल्य ४० लाख युरो हुनेछ।</p>
<p>बाँकी प्रदर्शनका आधारमा पारिश्रमिक थपिने विभिन्न सर्तहरु हुनेछन्। जसअनुसार बार्सिलोनामा रहँदा वार्षिक रुपमा ३ करोड युरो कमाउँदै आएका स्वारेजको आम्दानी अब आधा घट्नेछ।</p>
<p>बार्सिलोनामा ६ वर्ष विताउने क्रममा स्वारेजले २८३ खेल खेल्दै १९८ गोल गरेका थिए। २०१४ मा उनले लिभरपुलबाट ७ करोड ४० लाख युरोमा बार्सिलोनासँग सम्झौता गरेका थिए।</p>
<p>बार्सिलोनाबाट उनले चार पटक घरेलु ला लिगा, चार पटक कोपा डेल रेको उपाधि जित्नुका साथै च्याम्पियन्स लिग तथा क्लब विश्वकपको पनि उपाधि उचालेका थिए।</p>
प्रतिक्रिया दिनुहोस्
.jpg)
