राजस्थानसँग १६ रनले हार्यो चेन्नई
<p>काठमाडौं। इन्डियन प्रिमियर लिग (आईपीएल)मा आज राजस्थान रोयल्सले चेन्नई सुपर किङ्ग्सलाई १६ रनले पराजित गरेको छ।</p>
<p>कोरोना भाइरसका कारण लामो समय अनिश्चित बनेर पनि यूएईमा गएर सम्भव भएको सबैभन्दा ठूलो ट्वान्टी-२० फ्रेन्चाइजमा राजस्थानले सुखद् सुरुआत गरेको हो।</p>
<p>टस हारेर पहिले ब्याटिङको निम्तो पाएको राजस्थानले निर्धारित २० ओभरमा ७ विकेट गुमाएर २१६ रनको योगफल तयार पारेको थियो।</p>
<p>राजस्थानलाई विशाल योगफलतर्फ डोर्‍याउन सञ्जु सेमसन र कप्तान स्टेभन स्मिथले आक्रमक अर्धशतक जोडेका थिए। त्यस्तै ८ बलको सामना गरेका जोफ्रा आर्चरले महत्त्वपूर्ण २७ को योगदान गरेका थिए।</p>
<p>तर, २१७ रनको विशाल विजय लक्ष्यसहित जवाफी ब्याटिङमा उत्रिएको चेन्नईका लागि पनि सुरुआती ब्याट्सम्यानले आशाको बाटो देखाएका थिए। </p>
<p>मुरली विजयको २१, शेन वाट्सनको ३३ र फाप डू प्लेस्सिसको अर्धशतकीय ७२ रन प्रेरित चेन्नईले कप्तान महेन्द्रसिंह धोनीको २९ तथा केदार जाधवको २२ रन मद्दतमा निर्धारित २० ओभर सकिँदा २०० रन मात्रै बनाउन सक्यो।</p>
<p>फलस्वरुप पहिलो खेलमा मुम्बई इन्डियन्सलाई हराएर दमदार सुरुआत गरेको चेन्नईको यात्रा दोस्रो खेलमै डगमगायो।</p>
<p>यसअघि राजस्थानका लागि ओपनिङमा आएका स्मिथले ४७ बलमा ४ चौका र ४ छक्कासहित ६९ तथा सेमसनले ३२ बलमा १ चौका र ९ छक्कासहित ७४ रनको अर्धशतकीय इनिङ खेलेका थिए।</p>
<p>त्यस्तै अन्तिममा ब्याटिङमा आएका जोफ्रा आर्चरले ८ बलमा २७ रनको इनिङ खेलेसँगै राजस्थानले निर्धारित २० ओभरमा ७ विकेट गुमाएर २१६ रनको योगफल तयार गरेको थियो।</p>
प्रतिक्रिया दिनुहोस्
.jpg)
