भिडाल इन्टर मिलानमा आवद्ध
<p>एजेन्सी। इटालियन सिरी ‘ए’को टोली इन्टर मिलानले बार्सिलोनाबाट आर्टुरो भिडाललाई भित्रयाउने प्रक्रिया पूरा गरेको जनाएको छ। </p>
<p>इन्टरका वर्तमान प्रशिक्षक एन्टोनियो कोन्टेको नेतृत्वमा यसअघि युभेन्टसमा काम गरिसकेका चिलीका अन्तर्राष्ट्रिय स्टार भिडालले पछिल्लो दुई सिजन स्पेनिस महारथी बार्सिलोनाबाट खेल्ने क्रममा क्याम्प नोउमा बिताएका थिए।</p>
<p>गत सिजन बार्सिलोनाका लागि ४३ खेल खेले पनि नयाँ प्रशिक्षक रोनाल्डो कोम्यानको रोजाईमा नपरेका कारण उनले इन्टरको बाटो तताएका हुन्।</p>
<p>युरोपेली फुटबलमा हाल खुला रहेको सरुवा बजार दौरान बार्सिलोना छोड्ने इभान राकेटिच र आर्थरपछि उनी तेस्रो मिडफिल्डर हुन्।</p>
<p>इन्टरले मंगलबार आफ्नो वेभसाइटमार्फत ३३ वर्षे मिडफिल्डरसँग सम्झौता गरेको पुष्टी गरेको छ।</p>
<p>बार्सिलोनासँग एक वर्षको सम्झौता बाँकी रहँदै इन्टर सरुवा भएका भिडालले यसअघि कोलो–कोलो, बायर लेभरकुसन र बायर्न म्युनिखबाट पनि खेलिसकेका छन्।</p>
प्रतिक्रिया दिनुहोस्
.jpg)
