ब्राइटनको सहज जितमा मौपेको दुई गोल
<p>एजेन्सी। निएल मौपेको दुई गोलप्रेरित ब्राइटन एन्ड होभ अल्बियनले इङ्लिस प्रिमियर लिगमा आज न्युक्यासल युनाइटेडलाई ३-० को नतिजामा पराजित गरेको छ।</p>
<p>न्युक्यासलको मैदानमा भएको खेलको चौथो मिनेटमा एलान सेन्ट म्याक्सिमिनले ब्राइटनका टारिक ल्याम्प्टीलाई पेनाल्टी एरियामा लडाएपछि भ्रमणकारी टोलीले पेनाल्टी पाएको थियो।</p>
<p>सोही पेनाल्टीलाई गोलमा परिणत गर्दै मौपेले ब्राइटनलाई अग्रता दिलाएका थिए। त्यसको तीन मिनेट नबित्दै लियोनार्दो ट्रोसवार्डले दिएको पासलाई मौपेले व्यक्तिगत दोस्रो गोलमा परिणत गरे।</p>
<p>सुरुआती १० मिनेट नबित्दै २-० को अग्रता लिएको ब्राइटनले तेस्रो गोलका लागि ८३औं मिनेटसम्म निरन्तर प्रयास गर्नुपर्‍यो।</p>
<p>निर्धारित समयको खेल सकिन सात मिनेट बाँकी रहँदा मौपेको पासलाई एरोन कोन्‍नोलीले गोल गर्दै ब्राइटनको जित सुनिश्चित गरे।</p>
<p>८९औं मिनेटमा येभेस बिसौमा रातो कार्डको सामना गर्दै मैदानबाट बाहिरिएपछि केही समय ब्राइटन १० जनामा सीमित भएको थियो। तर, त्यसअघिको अग्रताको उत्कृष्ट बचाउ गर्दै ब्राइटनले तीन अंक जोड्यो।</p>
<p>पहिलो खेलमा चेल्सीसँग पराजित भएको ब्राइटनले दुई खेलबाट ३ अंक बटुलेको छ।</p>
प्रतिक्रिया दिनुहोस्
.jpg)
