टोटेनह्यामको रोमाञ्चक जितमा सनको चार गोल
<p>एजेन्सी। सन ह्युङ मिनको चार गोलप्रेरित टोटेनह्यामले इङ्लिस प्रिमियर लिगमा आज साउथह्याम्टनलाई ५-२ को नतिजामा पराजित गरेको छ।</p>
<p>पहिलो खेलमा एभर्टनसँग पराजित भएको जोजे माउरिन्होको टोटेनह्यामले साउथह्याम्टनविरुद्ध पुनरागमन गर्दै रोमाञ्चक जित हासिल गर्‍यो।</p>
<p>साउथह्याम्टनको मैदान सेन्ट मेरिज रंगशालामा भएको खेलको ३२औं मिनेटमा ड्यानी इंग्सले गोल गर्दै घरेलु टोलीलाई अग्रता दिलाएका थिए।</p>
<p>पहिलो हाफको खेलसकिन एक मिनेट बाँकी रहँदा सनले गरेको बराबरी गोलसँगै टोटेनह्याम खेलमा फर्किएको थियो।</p>
<p>दोस्रो हाफमा आक्रमक शैलीमा मैदानमा उत्रिएको टोटेनह्यामका लागि सनले ४७औं मिनेटमा गोल गर्दै २-१ को अग्रता दिलाए।</p>
<p>ह्यारी केनले दिएको पासलाई ६४औं मिनेटमा जाली चुमाउँदै ह्याट्रिक पूरा गरेका सनले त्यसको ९ मिनेट नबित्दै व्यक्तिगत चौथो गोल गरे।</p>
<p>सनले गरेका चारै गोलका लागि पास दिएका केनले ८२औं मिनेटमा टोटेनह्यामका लागि पाँचौं गोल गरेका थिए।</p>
<p>निर्धारित समयको अन्तिम मिनेटमा पाएको पेनाल्टीमार्फत इंग्सले व्यक्तिगत दोस्रो गोल गरे पनि टोलीलाई हारबाट जोगाउन सकेनन्।</p>
<p>जितसँगै टोटेनह्यामले दुई खेलबाट तीन अंक जोडेको छ।</p>
प्रतिक्रिया दिनुहोस्
.jpg)
