अक्टोबरमा हाप्किडोको दोस्रो राष्ट्रिय भर्चुअल च्याम्पियनसिप
<p>काठमाडौं। नेपाल मार्शल आर्ट्स हाप्किडो संघले आगामी अक्टोबरमा भर्चुअल च्याम्पियनसिप आयोजना गर्ने भएको छ। संघका महासचिव सुवर्ण बिसीका अनुसार च्याम्पियनसिप आगामी १०-१५ अक्टोबरमा हुनेछ।</p>
<p>संघले आयोजना गर्न लागेको यो पहिलो भर्चुअल च्याम्पियनसिप हो। समग्रमा भने हाप्किडोको यो दोस्रो भर्चुअल च्याम्पियनसिप हो। यसअघि पहिलो भर्चुअल च्याम्पियनसिप नुवाकोट जिल्ला हाप्किडो संघले आयोजना गरेको थियो।</p>
<p>च्याम्पियनसिपमा सेल्फ डिफेन्स, हाई फल/लङ फल र वेपन टेक्हनिकमा प्रतिस्पर्धा हुनेछ। च्याम्पियनसिपमा सहभागी खेलाडीले १० देखि १५ अक्टोबरभित्र आफ्नो भिडियो पठाइसक्नुपर्ने छ।</p>
<p>खेलाडीहरुले पठाएको भिडियोको आधारमा च्याम्पियनसिपको नतिजा २० अक्टोबरमा सार्वजनिक गरिने संघले जनाएको छ। विजेता खेलाडीहरुले नगद पुरस्कारसहित मेडल र प्रमाणपत्र प्राप्त गर्ने छन्। संघले कोभिड १९ महामारीको समयमा समेत आफ्ना खेलाडीलाई खेलप्रति सक्रिय बनाइराख्न भर्चुअल प्रतिस्पर्धाको आयोजना गरिएको संघले जनाएको छ।</p>
<p>"कोभिड १९ संकटको यो समय सबैमा त्रास फैलिएको छ। नियमित अभ्यास र प्रतिस्पर्धामा हुने खेलाडीसमेत लामो समय घरभित्रै बस्नुपर्दा थप समस्या थपिएको छ", संघका महासचिव बिसी भन्छन्, "खेलाडीहरुलाई यो समस्याबाट मुक्त गराउनका लागि पनि भर्चुअल च्याम्पियनसिपको आयोजना गरिएको हो।"</p>
<p>संघले प्रतिस्पर्धामा सहभागी हुनेभिडियो तीनदेखि पाँच मिनेटसम्मको हुनुपर्ने जनाएको छ। प्रतिस्पर्धामा सहभागी सबैले हाप्किडोको ड्रेस लगाएको हुनुपर्ने तथा भिडियोसँगै सहभागी खेलाडीको पूरा नाम र ठेगाना पनि राखिएको हुनुपर्ने नियम संघले बनाएको छ।</p>
प्रतिक्रिया दिनुहोस्
.jpg)
