सेभिया सात वर्षमा चाैथो पटक युरोपा लिग च्याम्पियन
<p>एजेन्सी। फाइनलमा इन्टर मिलानमाथि ३-२ गोलको रोमाञ्चक जित निकाल्दै स्पेनिस क्लब सेभियाले छैठौं पठक युरोपा लिगको उपाधि जितेको छ।</p>
<p>गए राति कोलोग्नमा भएको खेलको पाँचौं मिनेटमा रोमेलु लुकाकुले पेनाल्टीमार्फत गोल गर्दै इन्टर मिलानलाई अग्रता दिलाएका थिए। सेभियाका रक्षक डिएगो कार्लोसले लुकाकुलाई नै १८ यार्ड बक्समा लडाएपछि इन्टरले पेनाल्टी पाएको थियो।</p>
<p>तर, सेभियाका लागि १२औं मिनेटमा बराबरी गोल फर्काएका लुक डी जोङले ३३औं मिनेटमा पुन: गोल गर्दै टोलीलाई पहिलो पटक अग्रता दिलाए। त्यसको तीन मिनेट बित्न नपाउँदै इन्टरका डिएगो गोडिनले बराबरी गोल फर्काए।</p>
<p>प्रतिस्पर्धात्मक खेलको पहिलो हाफ २-२ गोलको बराबरीमा टुङ्गिएको थियो। दोस्रो हाफको सुरुआतदेखि नै दुवै टोलीले गोलका लागि उत्तिकै प्रयास गरेका थिए।</p>
<p>तर, ७४औं मिनेटमा सेभियाका डिएगो कार्लोसले प्रहार गरेको बाइसइकल किक लुकाकुले क्लियर गर्न खोज्दा आत्मघाति गोलमा परिणत भएको थियो।</p>
<p>निर्धारित ९० मिनेटको खेल सकिन १५ मिनेट बाँकी रहँदा ३-२ ले पछि परेको इन्टरले बाँकी समयमा गोल फर्काउन नसक्दा ९ वर्षमा जित्न लागेको पहिलो उपाधिबाट पनि वञ्चित हुनुपर्‍यो।</p>
<p>अर्कातिर, पछिल्लो सात वर्षमा चौथो पटक युरोपा लिगको उपाधि उचालेको सेभियाका प्रशिक्षक लोप्तेगीले प्रशिक्षकको हकमा पहिलो उपाधि जिते।</p>
प्रतिक्रिया दिनुहोस्
.jpg)
