एम्बाप्पेलाई रोक्न कोम्यानले बायर्नका खेलाडीलाई सल्लाह दिने
<p>एजेन्सी। बायर्न म्युनिखका विङ्गर किङ्ग्सली कोम्यानले आफ्ना ‘टीममेट’लाई पेरिस सेन्ट जर्मन (पीसजी)का स्टार फरवार्ड किलियान एम्बाप्पेलाई रोक्ने टिप्स दिने भएका छन्।</p>
<p>आइतबार राति हुने च्याम्पियन्स लिगको फाइनलमा बायर्नले पीएसजीसँग खेल्दै छ। कप डी फ्रान्सको फाइनलमा घाइते भएका एम्बाप्पेले पोर्चुगलको लिस्बोनमा हुने फाइनल खेल्ने सम्भावना कम थियो।</p>
<p>तर, क्वार्टरफाइनलमा एट्लान्टाविरुद्ध नाटकीय जित दिलाउन गरेको गोलसँगै मैदानमा फर्किएका २१ वर्षीय स्टार फरवार्ड एम्बाप्पेले फाइनल पूर्ण समय खेल्ने लगभग निश्चित छ। </p>
<p>दूर्त गति र अचुक फिनिसरको पहिचान बनाएका एम्बाप्पेलाई रोक्न उनको राष्ट्रिय टोलीका सहपाठी कोम्यानले बायर्नका रक्षकलाई सल्लाह दिने भएका हुन्।</p>
<p>“मैले धेरै पटक एम्बाप्पेसँग खेलेको छु,” उनले भने, “त्यसैले मेरो टीमका रक्षकलाई म सक्दो सल्लाह दिन्छु।”</p>
<p>क्वार्टरफाइनलमा बार्सिलोनालाई ८-२ गोलको नतिजामा पराजित गर्दै अन्तिम ४ मा आइपुगेको बायर्नले सेमिफाइनलमा लियोनलाई ३-० ले हराएको थियो।</p>
<p>त्यस्तै, क्वार्टरफाइनलमा एटलान्टालाई २-१ ले पराजित गर्दै अन्तिम चारमा आइपुगेको पीएसजीले आरबी लाइपजिगलाई ३-० ले पराजित गर्दै पहिलो पटक फाइनलमा स्थान बनाएको हो। <br />
</p>
प्रतिक्रिया दिनुहोस्
.jpg)
