लालाना ब्राइटन एण्ड होभमा
<p>काठमाडौं। प्रिमियर लिग च्याम्पियन लिभरपुल छोडेपछि एडम लालानाले तीन वर्षका लागि लिगकै प्रतिद्वन्द्वी ब्राइटन एण्ड होभसँग सम्झौता गरेका छन्।</p>
<p>इङल्यान्डका पूर्व अन्तर्राष्ट्रिय खेलाडी लालानालाई बितेको सिजन लिभरपुलमा किनारा लगाइएको थियो। आइतबार सिजन सकिएसँगै लिभरपुलसँगको उनको सम्झौता पनि सकिएको थियो।</p>
<p>३२ वर्षे लालाना केही समयअघि देखि नै ब्राइटन सरुवाका लागि सहमत भइसकेको चर्चा थियो। सोमबार साँझ ब्राइटनले उनीसँग सम्झौता भएको पुष्टि गरेको थियो।</p>
<p>“एडमको क्षमतामा कुनै प्रश्न छैन। उनले सबैखालको उच्चस्तरीय फुटबलको अनुभव लिइसकेका छन्। क्लब र देशका लागि उच्च स्तरमा खेल्दा उनले आफूलाई प्रमाणित गरिसकेका छन्,” ब्राइटनका मुख्य प्रशिक्षक ग्राहम पटरले भने, “उनको आगमनले हाम्रो टिमलाई प्राविधिक र परिपक्वता दुवै हिसावले फाइदा पुग्नेछ।”</p>
<p>२०१४ मा साउथह्याम्पटनबाट लिभरपुल सरुवा भएका लालानाले इङल्यान्डका लागि ३४ पटक अन्तर्राष्ट्रिय खेल खेलेका छन्। पछिल्लो सिजन खासै मौका नपाए पनि क्लोपका सुरुआति दिनमा लालाना लिभरपुलका मुख्य खेलाडी थिए।</p>
<p>लिभरपुलले पछिल्लो १४ महिनाको बीचमा च्याम्पियन्स लिग, युइएफए सुपर कप, क्लब विश्वकप र प्रिमियर लिगको उपाधि जिते पनि लालानाले भने चोटका कारण टिममा खासै योगदान गर्न सकेका थिएनन्। </p>
<p>२०१७-१८ सिजनको सुरुआतमा तिघ्रामा चोट लागेयता लालानाले लिभरपुलबाट खासै मौका पाउन छोडेका थिए। पछिल्ला तीन सिजनमा उनले लिगका ९ खेलमा मात्र पहिलो रोजाइबाट खेल्ने मौका पाएका थिए।</p>
<p>प्रिमियर लिगमा बढुवा भएपछिको तेस्रो सिजन ब्राइटनले १५औं स्थानमा रहेर टुङ्ग्याएको थियो। टोली रेलिगेसन क्षेत्रभन्दा सात अंकले माथि थियो।<br />
</p>
प्रतिक्रिया दिनुहोस्
.jpg)
