रामोसको गोलमा रियालको जित, शीर्ष स्थानमा सात अंकको अग्रता
<p>काठमाडौं। कप्तान सर्जियो रामोसले लगातार दोस्रो खेलमा गोल गरेको दिन रियाल मड्रिडले आज एथलेटिक विल्बाओलाई १-० ले पराजित गरेको छ।</p>
<p>जितसँगै रियालले स्पेनिस ला लिगाको शीर्ष स्थानमा सात अंकको स्पष्ट अग्रता लिएको छ। </p>
<p>रामोसले खेल सकिन १७ मिनेट बाँकी रहँदा पेनाल्टीमा गरेको गोल रियालको जितमा निर्णायक बनेको थियो।</p>
<p>एथलेटिक विल्बाओका ड्यानी गार्सियाले मार्सेलोलाई फाउल गरेपछि भिडियो सहायक रेफ्री (भिएआर)ले रियाललाई पेनाल्टी अवसर दिएको थियो। </p>
<p>पेनाल्टी अवसरलाई रामोसले कुनै गल्ती नगरी गोलमा परिणत गरेका थिए। रामोसले सिजन पुनः सुरू भएपछिको सातमध्ये पाँच खेलमा गोल गरेका छन्। रियालले सातै खेल जितेको छ। </p>
<p>रियाल मड्रिडको जितमा गोलकिपर थिबाउट कोर्टियसले उत्कृष्ट बचाउ गरेका थिए। १९९४/९५ मा फ्रान्सिस्को बुयोपछि ला लिगाको एकै सिजन १७ क्लिनसिट गर्ने कोर्टियस पहिलो रियाल मड्रिडका गोलकिपर बने। </p>
<p>जितसँगै रियालले ३४ खेलबाट ७७ अंक जोडेको छ। जुन दोस्रो स्थानको बार्सिलोनाभन्दा सात अंकले माथि हो। बार्सिलोनाले एक खेल कम खेलेको छ। साविक विजेता बार्सिलोनाले आज राति भिल्लारियालको भ्रमण गर्नेछ।</p>
<p>जिनेदिन जिदानको रियालले अब ला लिगको बाँकी चार खेलमध्ये तीन खेल जिते ला लिगाको उपाधि पक्का गर्नेछ। रियालले २०१२ पछि ला लिगाको उपाधि जितेको छैन।</p>
प्रतिक्रिया दिनुहोस्
.jpg)
