प्रिमियर लिग: लिभरपुल र म्यानचेष्टर सिटीको पुनरागमन जित, युनाइटेड बर्नमाउथसँग पराजित
<p>काठमाडौं। शीर्ष स्थानको लिभरपुल र म्यानचेष्टर सिटीले प्रिमियर लिगमा पुनरागमन जित हात पार्दा म्यानचेष्टर युनाइटेड भने एएफसी बर्नमाउथसँग पराजित भएको छ।</p>
<p>लिभरपुल र सिटी दुवैले एक गोलले पछि परेको अवस्था उल्टाउँदै खेल जितेको हो।</p>
<p>साडियो मानेले इन्जुरी टाइममा गोल गरेपछि लिभरपुलले एस्टन भिल्लालाई उसैको मैदानमा २-१ ले पराजित गरेको हो। </p>
<p>ट्रेजग्वेटले २१औं मिनेटमा गोल गर्दै एस्टन भिल्लालाई अग्रता दिलाएका थिए।</p>
<p>८६औं मिनेटसम्म लिभरपुल एक गोलले पछि थियो। ८७औं मिनेटमा एन्डी रोवर्टसनले गोल गर्दै खेल बराबरी गरेका थिए। इन्जुरी टाइममा मानेले गोल गर्दै लिभरपुललाई ३ अंक दिलाए।</p>
<p>पुनरागमन जितपछि लिभरपुलले यस सिजनको अपराजित यात्रा कायम राखेको छ। ११ खेलबाट ३१ अंकसहित लिभरपुल शीर्ष स्थानमा छ।</p>
<p>यस्तै म्यानचेष्टर सिटीले अन्तिम २० मिनेटभित्र दुई गोल फर्काउँदै साउथह्याम्पटनलाई २-१ ले पराजित गरेको हो।</p>
<p>१३औं मिनेटमा जेम्स वार्ड प्रोवसले गोल गर्दै साउथह्याम्पटनलाई अग्रता दिलाएका थिए।</p>
<p>७०औं मिनेटमा सर्जियो अगुएरोले गोल गर्दै खेल बराबरी गरे। ८६औं मिनेटमा केल वाल्करले गोल गरेपछि सिटीले २-१ को जित हात पारेको हो।</p>
<p>जितपछि ११ खेलबाट २८ अंक जोडेको सिटी लिभरपुललाई पछ्याउदै दोस्रो स्थानमा यथावत छ।</p>
<p>उता अर्को म्यानचेष्टर क्लब भने बर्नमाउथसँग १-० ले पराजित भएको छ। बर्नमाउथलाई घरेलु मैदानमा जित दिलाउन जोसुअ किङले ४५औं मिनेटमा गोल गरे। </p>
<p>लण्डन क्लब चेल्सीले जित हात पार्दा अर्को लण्डन क्लब आर्सनल भने बराबरीमा रोकिएको छ। चेल्सीले वाटफोर्डलाई २-१ ले पराजित गर्‍यो।</p>
<p>चेल्सीका लागि टोमी अब्रहामले पाँचौ र क्रिस्टियन पुलिसिकले ५५औं मिनेटमा गोल गरे।</p>
<p>वाटफोर्डका लागि जेरार्ड डेउलोफेढले एक गोल फर्काए। जितपछि ११ खेलबाट २३ अंकसहित चेल्सी तेस्रो स्थानमा छ।</p>
<p>आर्सनल भने वुल्भ्ससँग १-१ गोलको बराबरीमा रोकिएको छ।</p>
<p><br />
</p>
प्रतिक्रिया दिनुहोस्
.jpg)
