टेनिस च्याम्पियनसीपमा सौगात र रायनालाई स्वर्ण
<p>काठमाडौं। नेपालका सौगात विक र रायना शाहले एसियाली यू-१४ र्‍याङकिङ सी-२ टेनिस च्याम्पियनसीपमा शुक्रबार स्वर्ण जितेका छन्।</p>
<p>सिंगल्सतर्फ ब्वाइजमा सौगात तथा गल्सतर्फ रायना पहिलो भएका हुन्।</p>
<p>नेपाल टेनिस संघद्वारा आयोजित प्रतियोगिताको ब्वाइज सिंगल्स फाइनलमा सौगातले नेपालकै चिराग तिम्सिनालाई ६-१ र ७-५ को सोझो सेटमा पराजित गरे। सौगातले प्रतियोगितामा दोहोरो स्वर्ण जितेका छन्।</p>
<p>बिहीवार पुरुष डबल्समा सौगातले भारतका मनुराज सिंहसँग मिलेर स्वर्ण जितेका थिए।</p>
<p>गल्स डबल्समा नेपालका अजा रेग्मी र शुभाङगीलक्ष्मीको जोडीले स्वर्ण जितेका थिए।</p>
<p>सातदोबाटोस्थित टेनिस कम्प्लेक्समा भएको गल्स सिंगल्स उपाधि भिडन्तमा रायनाले आफ्नै राष्ट्रकी शुभाङगीलक्ष्मी शाहलाई ६-० र ६-३ को सिधा सेटमा हराइन्।</p>
<p>विजेतालाई नेपाल टेनिस संघकी अध्यक्ष ज्योति राणाले पुरस्कार प्रदान गरिन्। पाँचदिने प्रतियोगितामा नेपालसहित पाँच राष्ट्रका ४७ खेलाडी सहभागी थिए। </p>
<p>नेपालबाट सर्वाधिक ३७ खेलाडीले प्रतिस्पर्धा गरेका थिए । भारतबाट ६, स्विट्जरल्यान्डबाट २ तथा जापान र मलेसियाबाट समान १–१ खेलाडीले भाग लिएका थिए।</p>
<p> </p>
प्रतिक्रिया दिनुहोस्
.jpg)
