एएफसी फुटसल च्याम्पियनसीप छनोटमा नेपाल जितविहीन
<p>काठमाडौं। एएफसी फुटसल च्याम्पियनसीप छनोट अन्तर्गत सेन्टर तथा दक्षिण एसियाली छनोटको समूह ए मा रहेको नेपाल जितविहीन हुँदै प्रतियोगिताबाट बाहिरिएको छ।</p>
<p>इरानमा आज अफ्गानिस्तानसँग भएको समूहको अन्तिम खेलमा ६-२ गोलले पराजित हुँदै नेपाल प्रतियोगितामा जितविहीन बनेको हो।</p>
<p>खेलको दोस्रो मिनेटमा मोहसेन रेजायीको गोलबाट अफ्गानिस्तानले अग्रता लिएको थियो। छैठौं मिनेटमा आदिल हामिदले गोल गर्दै खेल बराबरीमा ल्याए।</p>
<p>१२औं मिनेटमा सेयेद होसेइन मौसभिले गोल गर्दै २-१ ले पछि परेको नेपालका लागि १६ औं मिनेटमा मणी लामाले गोल गर्दै खेल २-२ को बराबरीमा ल्याए।</p>
<p>१७ औं मिनेटमा अफ्गानिस्तानका अक्बर काजेमीले गोल गर्दा नेपाल पहिलो हाफमा ३-२ ले पछि पर्‍यो। </p>
<p>दोस्रो हाफमा अफ्गानिस्तानले थप ३ गोल गर्‍यो। २७औं मिनेटमा मेहदी हशेमीले गोल गर्दा नेपाल ४-२ ले पछि पर्‍यो।</p>
<p>३६औं मिनेटमा फर्जाद महमोदी र खेलको अन्तिम मिनेटमा सेयेद होसेइन मौसभिले व्यक्तिगत दोस्रो गोल गरेपछि नेपाल अफगानिस्तानसँग ६-२ ले पराजित भएको हो।</p>
<p>नेपालको यो लगातार तेस्रो हार हो। पहिलो खेलमा ताजिकिस्तानसँग ६-० ले पराजित भएको नेपाल दोस्रो खेलमा उज्वेकिस्तानसँग ४-१ ले पराजित भएको थियो।</p>
<p>सन् २०२० मा तुर्केमिनिस्तानमा हुने एएफसी फुटसल च्याम्पियनसीपका लागि नेपाल सम्मिलित समूह ए बाट उज्वेकिस्तान र ताजिकिस्तान छनोट भएका छन्।<br />
</p>
प्रतिक्रिया दिनुहोस्
.jpg)
