नेकपा केन्द्रीय कमिटी बैठक : आजदेखि प्रतिवेदनमाथि समूहगत छलफल
<p>काठमाडौं। नेपाल कम्युनिष्ट पार्टी (नेकपा) को जारी केन्द्रीय कमिटी बैठकमा राजनीतिक तथा सांगठनिक प्रतिवेदनमा आजदेखि समूहगत छलफल हुँदैछ।</p>
<p>१५ माघदेखि राष्ट्रिय सभागृहमा शुरु भएको बैठकमा प्रतिवेदनउपर छलफल गर्न सदस्यहरूलाई १५ वटा समूहमा विभाजन गरिएको नेकपाका प्रचार विभाग उपप्रमुख सूर्य थापाले जानकारी दिए।</p>
<p>उक्त १५ समूहमा सचिवालय सदस्य छैनन् । समूह नेताले समूहका तर्फबाट २० मिनेटमा लिखित प्रतिवेदन प्रस्तुत गर्ने छन्।</p>
<p>अध्यक्षद्वयको तर्फबाट अध्यक्ष पुष्पकमल दाहालले प्रस्तुत गरेको राजनीतिक र महासचिव विष्णु पौडेलद्वारा प्रस्तुत सांगठनिक प्रतिवेदन छलफलपछि १७-१८ माघमा समूहका नेताले आ-आफ्नो समूहको तर्फबाट लिखित प्रतिवेदन प्रस्तुत गर्ने कार्यविधि तय गरिएको छ। </p>
<p><img alt="" height="640" src="https://www.dekhapadhi.com/storage/photos/shares/Politics/CPN_meeting_1.jpg" width="960" /></p>
<p>कार्यतालिका अनुसार समूहगत छलफलमा उठेका विषयमा १९ माघमा निष्कर्ष प्रस्तुत गर्ने र दस्तावेज पारित गरिने छ।</p>
<p>केन्द्रीय कमिटी बैठकले सचिवालय र स्थायी कमिटी बैठकले गरेका निर्णयउपर छलफल गर्ने र अनुमोदन गर्ने छ।</p>
<p>आज दोस्रो दिन पुनः ११ बजेदेखि बैठक बस्ने छ।</p>
<p>सातवटै प्रदेशका अध्यक्षले आ–आफ्नो प्रदेश कमिटीको प्रतिवेदन प्रस्तुत गर्ने कार्यसूची भए पनि समय अभावका कारण पहिलो दिन त्यो हुन सकेन।</p>
<p>प्रधानमन्त्री तथा नेकपा अध्यक्ष केपी शर्मा ओलीले उद्घाटन मन्तव्य दिएर बैठक शुरु गरेका थिए।</p>
<p>तत्कालीन नेकपा एमाले र नेकपा माओवादी केन्द्रको एकीकरणबाट गठित नेकपाको केन्द्रीय कमिटी बैठक २१ महीनापछि बसेको हो।<br />
</p>
<p> </p>
प्रतिक्रिया दिनुहोस्
.jpg)
