कांग्रेस बैठक आज, फोरम लोकतान्त्रिकका नेता-कार्यकर्ताहरुको समायोजन टुंगिने
<p>काठमाडौं। प्रमुख प्रतिपक्षी दल नेपाली कांग्रेस पार्टीको केन्द्रीय समितिको बैठक आज दिउँसो १ बजे पार्टी मुख्यालय सानेपामा बस्दैछ।</p>
<p>विजयकुमार गच्छदार नेतृत्वको तत्कालीन फोरम लोकतान्त्रिकले कांग्रेससँग एकता गर्दा गच्‍छदारले पेश गरेका २५ हजार ४ सय ६८ जना क्रियाशील सदस्यको छानविन र जिम्मेवारी आजको बैठकको मुख्य एजेण्डा रहेको नेपाली कांग्रेसका केन्द्रीय सदस्य शिव हुमागाइले बताए।</p>
<p>२० कात्तिक २०७४ मा पार्टी एकीकरण गरेका गच्छदारले पेश गरेको नामावलीमा छानवीन गर्न उपसभापति विमलेन्द्र निधिको संयोजकत्वमा ५ सदस्यीय समिति बनाइएको छ। </p>
<p>समितिले छानविन गरेर तयार पारेको अन्तिम नामावली संख्याको आधारमा मापदण्ड बनाएर बैठकले जिल्लामा सदस्य तथा पदाधिकारीहरु अनुमोदन गर्ने र फोरमसँगको एकतालाई पूर्णता दिइने बताइएको छ। </p>
<p>तरुण दलमा अध्यक्ष र महासचिवबीच देखिएको विवाद र त्यसबाट संगठनमा उत्पन्न समस्याको विषयमा पनि पार्टीले चासो राखेर समाधानको ठोस निर्णय लिइने एक केन्द्रिय सदस्यले बताए। </p>
<p>१४ असोजमा सकिएको दोस्रो चरणको देशब्यापी जागरण अभियानको समीक्षा र भावी योजना निर्माण, भातृ तथा शुभेच्छुक संस्थाहरुको विधान संशोधनको काम पनि आजको बैठकले टुंगाउने छ। </p>
प्रतिक्रिया दिनुहोस्
.jpg)
