कोभिड-१९ प्रभाव : पहिलो पटक रोकियो बालाजु बाइसधाराको मेला
<p>काठमाडौं। हरेक वर्ष चैत शुक्ल पूर्णिमाका दिन लाग्ने बालाजु बाइसधाराको मेला यस वर्ष कोभिड- १९ का कारण स्थगन गरिएको छ।</p>
<p>लकडाउन र कोरोना भाइरस संक्रमणको जोखिमका कारण भोलि मेला आयोजना नगरिए पनि पूजाआराधना भने गरिने बालाजु बाइसधारा मूल पुजारी थकाली धनलाल महर्जनले जानकारी दिए।</p>
<p>बाइधारा क्षेत्रवासी एवं शहरी विकास राज्यमन्त्री रामवीर मानन्धरले पनि सदियौँदेखि चलिआएको यो मेला यस वर्ष स्थगन गरिएको बताए।</p>
<p>मन्त्री मानन्धरले इतिहासमा पहिलो पटक स्थगन भएको बताउँदै नित्य पूजा र अन्य पूजा भने चलिरहने व्यवस्था मिलाइएको जानकारी दिए।</p>
<p>जात्राका दिन बाइसधारामा स्नान गरी मृत आफन्तका नाममा बत्ती बाल्ने परम्परा छ।</p>
<p>यसै दिन नुवाकोटको कडल्चोक भगवतीलाई पनि बालाजुमा ल्याएर त्यहाँ रहेको हालको सेतो पाटीमा राखी हवन तथा राँगाको बलि दिइन्छ।</p>
<p>मनमैजु देवीको जात्रासँग पनि बालाजु बाइसधाराको प्रसङ्ग जोडिएको छ ।</p>
<p>नेवार समुदायले मनाउने ल्हुती पूर्णिमाको मेलासँगै मनमैजु जात्रा पनि शुरु हुने परम्परा थियो।</p>
<p>यस दिन बालाजुको बाइसधारामा नुहाएर मनमैजु देवीको दर्शन गरेमा आफ्नो मनोकामना पूरा हुने धार्मिक विश्वास छ।</p>
<p>बाइसधारामा नुहाउँदा छालाका रोगसमेत निको हुने भक्तजन बताउँछन् । </p>
<p>किंवदन्तीअनुसार विपस्वी बुद्धले कमलको फूल रोपेर मन्त्रोच्चारण गर्दा यहाँ स्वयम्भू ज्योतिरुप उत्पत्ति भएको थियो।</p>
<p>यसै मान्यतानुसार बाइसधारा जात्रा मनाइने चलन रहिआएको मानिन्छ। <em>रासस</em></p>
प्रतिक्रिया दिनुहोस्
.jpg)
