चिनियाँ राष्ट्रपति र नेकपा नेतृत्वबीच सहयोग आदानप्रदान गर्ने प्रतिवद्धता
<p>काठमाडौं। नेपाल कम्युनिष्‍ट पार्टी (नेकपा) का शीर्षस्थ नेतृत्व र चिनियाँ राष्ट्रपति सी चिनफिङसँगको भेटवार्तामा एकतावद्ध भएर सहयोग आदानप्रदान गर्ने प्रतिवद्धता दुवै पक्षले जनाएका छन्।</p>
<p>नेपालको दुई दिने राजकीय भ्रमणमा रहेका चिनियाँ राष्ट्रपति सीसँगको भेटमा अध्यक्ष पुष्पकमल दाहालले चीन र चिनियाँ कम्युनिष्ट पार्टीेको प्रगतिबाट आफूहरु उत्प्रेरित भएको बताएका छन्।</p>
<p>‘संविधान जारी गरेर देश स्थायित्वतर्फ अघि बढेको छ, हामी एक चीन नीतिमा अविचलित छौं नेपालको विकासमा चीनको निरन्तर सहयोगको अपेक्षा गरेका छौं’, दाहालको भनाई उद्धृत गर्दै नेकपाका नेता माधवकुमार नेपालले <em>देखापढी</em>सँग भने।</p>
<p>भेटवार्तामा चिनियाँ राष्ट्रपति सीले नेपाल चीनको राम्रो र भरपर्दो मित्र भएको भन्दै आफूहरू नेपालको विकास साझेदार बन्न तयार रहेको बताएका छन्।</p>
<p>दुवै देशमा कम्युनिष्ट पार्टी नेतृत्वको शासन रहेकोले ऐक्यबद्धता मजबुत हुने सीले बताएको नेपालले जनाए।</p>
<p>सीसँगको भेटमा अध्यक्ष दाहाल, नेकपाका वरिष्ठ नेताहरू एवं पूर्वप्रधानमन्त्रीहरू झलनाथ खनाल र माधवकुमार नेपाल, सचिवालयका सदस्यहरू उपप्रधानमन्त्री ईश्वर पोखरेल, गृहमन्त्री रामबहादुर थापा, नेता वामदेव गौतम, प्रवक्ता नारायणकाजी श्रेष्ठ, महासचिव विष्णु पौडेल र परराष्ट्रमन्त्री प्रदीपकुमार ज्ञवाली सहभागी थिए।</p>
<p>राष्ट्रपति सीका साथ चिनियाँ विदेशमन्त्री वाङ यी, चीन सरकारका अन्य वरिष्ठ नेता तथा नेपालका लागि चिनियाँ राजदूत हउ यान्छी सहभागी थिए।<br />
</p>
प्रतिक्रिया दिनुहोस्
.jpg)
