Others

गृहपृष्ठ

भूपरिवेष्ठित देशबाट भूजडित देश बन्ने नेपालको सपना साकार तुल्याउन मद्दत गर्नेछौं: चिनियाँ राष्ट्रपति सी (सम्बोधनको पूर्णपाठ) काठमाडौं । चिनियाँ राष्ट्रपति सी चिनफिङले भूपरिवेष्ठित मुलुकबाट भूजडित मुलुक बन्ने नेपालकाे प्रयासमा चीनले सघाउने बताएका छन् । उनको सम्मानमा राष्ट्रपति विद्यादेवी भण्डारीले आज साँझ दिएकाे राजकीय रात्रिभोज शुरू हुनु अघि मन्तव्य राख्दै राष्ट्रपति सीले यस्ताे बताएका हुन्। होटल सोल्टी क्राउन प्लाजामा आयाेजित रात्रिभोजमा शुरुमा राष्ट्रपति भण्डारीले <a href="https://dekhapadhi.com/news/939">स्वागत मन्तव्य</a> दिएकी थिइन् ।  त्यसपछि चिनियाँ राष्ट्रपति सीले ‘नमस्ते’ भनेर सम्बोधन शुरु गरे । अनि उनले भने– “मैले बोलेको त्यति राम्रो सुनिएन होला ।” सम्बोधनका क्रममा राष्ट्रपति सीले चीन र नेपालबीच कुनै समस्या नरहेको र मित्रता मात्र रहेको बताएका छन् ।  उनले भने, “नेपाल अब भूपरिबेष्ठित मुलुकबाट भूजडित मुलुक हुनेछ । त्यसका लागि चीनले नेपाललाई सघाउने छ ।  बढीभन्दा बढी व्यापारिक नाका खोल्न पनि चीन तयार छ । भूकम्पपछिको पुनःनिर्माणमा अझ सहायता वृद्धि हुनेछ ।” राष्ट्रपति सीले यसो भनेर चीनको सहयोगमा केरुङ–काठमाडौं सुरुङ मार्ग र रेल मार्ग सम्बन्धी परियोजना अघि बढ्ने संकेत गरेका छन् ।  सम्बोधनका क्रममा प्रशन्न देखिएका उनले भने, "हामी शुरु गरेकाे काम पूरा गरेरै छाड्छाै&zwnj;ं, चीनमा हामीले त्यही गरेका छाैं ।" उनले नेपाल भ्रमण बर्ष २०२० मा चिनियाँ पर्यटकलाई नेपाल घुम्न उत्प्रेरित गर्ने समेत बताए । त्यसैगरी  चिनियाँ राष्ट्रपति सीले अरनीकाे राजमार्गकाे स्तराेन्नति र सीमापार रेल सम्भाव्यता अध्ययनका लागि पनि चिनले सहयाेग गर्ने प्रतिवद्धता व्यक्त गरे।  सम्बाेधनकाे पूर्णपाठः सम्माननीय राष्ट्रपति विद्यादेवी भण्डारी ज्यू,  सम्माननीय प्रधानमन्त्री केपी शर्मा ओलीज्यू, महिला तथा सज्जनवृन्द तथा प्यारा मित्रहरू नमस्ते ।  मैले भर्खरै चिनियाँ भाषामा लेखिएको नमस्ते भनेको छु, त्यति राम्रो छैन होला । शरदको ऋतुमा नेपालमा सयौं फूल फुलेका छन् । सम्माननीय राष्ट्रपति विद्यादेवी भण्डारीज्यूको हार्दिक निमन्त्रणामा म नेपालमा आएको छु । यो मेरो कान्तिपुर, काठमाडौंको पहिलो भ्रमण हो । यहाँ मैले पुराना तथा नयाँ साथीहरुसँग भेटें । नेपालको राजनीतिक स्थायित्व, सामाजिक सद्भाव र जनताको सुखी जीवन देख्दा म अत्यन्तै हर्षित भएको छु । भविश्यप्रति मेरा आशाहरु जागेका छन् ।  मलाई आशा छ, दुई देशले अझ घनिष्ठ राजनीतिक सम्बन्ध राख्नेछन् । चीन र नेपालवीच दौत्य सम्बन्ध भएको आधा शताब्दीभन्दा बढीको अवधिमा दुई देशले छिमेकी मुलुकहरुवीचको मैत्रीपूर्ण सम्बन्धको विश्वमा नमूना पेश गरेका छन् । मैले राष्ट्रपतिज्यूलाई के भन्न खोजेको हुँ भने चीन र नेपालको सम्बन्धको वीचमा केही समस्या छैन, मित्रता मात्र छ । <blockquote> हामीले चीन-नेपाल सीमापार रेलमार्गको सम्भाव्यता अध्ययन सुरु गर्नेछौं । अरनिको राजमार्गको सञ्चालनलाई सुनिश्चित बनाई त्यसलाई विभिन्न चरणमा स्तरोन्नति गर्नेछौं । केरुङदेखि काठमाडौंसम्मको सुरुङ मार्गको परियोजनालाई अगाडि बढाउन हामी सक्रिय हुनेछौं । बढीभन्दा बढी नाकाहरु खोली हिमालय वारपार बहुआयामिक कनेक्टिभीटी सञ्जालको निर्माण गर्नेछौं । र, नेपालको भूपरिवेष्ठित देशबाट भूजडित देश बन्ने सपना साकार तुल्याउन मद्दत गर्नेछौं । </blockquote> सम्मानीय राष्ट्रपति विद्यादेवी भण्डारी र मैले दुवै पक्षले चुनौती र कठिनाई सामना गर्दै साझा हित हुने सहकार्य गरेर विकास र समृद्धितर्फ उन्मुख हुने पुस्तौं पुस्ताको रणनीतिक सहकार्य साझेदार सम्बन्ध स्थापित गर्ने निर्णय गरेका छौं । मलाई आशा छ, दुई देशवीच अझ सुविधाजनक कनेक्टिभिटी सञ्जाल निर्माण हुनेछ ।  हामीले चीन-नेपाल सीमापार रेलमार्गको सम्भाव्यता अध्ययन सुरु गर्नेछौं । अरनिको राजमार्गको सञ्चालनलाई सुनिश्चित बनाई त्यसलाई विभिन्न चरणमा स्तरोन्नति गर्नेछौं । केरुङदेखि काठमाडौंसम्मको सुरुङ मार्गको परियोजनालाई अगाडि बढाउन हामी सक्रिय हुनेछौं । बढीभन्दा बढी नाकाहरु खोली हिमालय वारपार बहुआयामिक कनेक्टिभीटी सञ्जालको निर्माण गर्नेछौं । र, नेपालको भूपरिवेष्ठित देशबाट भूजडित देश बन्ने सपना साकार तुल्याउन मद्दत गर्नेछौं । मलाई आशा छ, दुई देशका जनतावीचको समझदारी बढ्नेछ । भूकम्पपश्चातको पुनर्निर्माण परियोजनाहरुलाई हामीले सक्रियताका साथ अगाडि बढाउँदैछौं । सन् २०२० नेपाल भ्रमण वर्षको अवधिमा हामी बढीभन्दा बढी चिनियाँ पर्यटकहरुलाई नेपालमा आउन उत्प्रेरित गर्नेछौं । हामी शिक्षा तथा सांस्कृतिक क्षेत्रका सहकार्यहरुमा लगानी बढाएर जनतावीचको समझदारी बढाउनेछौं । दुई देशका बढीभन्दा बढी शहरहरुलाई भगिनी शहरको सम्बन्ध स्थापित गर्न पनि उत्पे्ररित गर्नेछौं । जसबाट दुई देशवीचको मित्रताको बीज अंकुरण होओस् भन्ने चाहन्छौं । भर्खरै सम्माननीय राष्ट्रपतिज्यूले उल्लेख गर्नुभयो, लुम्बिनी बुद्धको जन्मस्थल हो । चीन बुद्ध धर्म मान्ने मान्छेहरुको संख्या संसारमा सबैभन्दा बढी भएको मुलुक हो । बुद्ध धर्म भारत र नेपालमा पनि धेरै चर्चित छ तर, अहिले चीनमा पनि स्थानीय धर्म बनेको छ । मेरो विचारमा आगामी दिनमा बढीभन्दा बढी बुद्ध धर्म मान्ने चिनियाँ मान्छेहरु नेपालमा पर्यटन गर्नेछन् र धर्मको आदान(प्रदानका लागि पनि आउनेछन् । मलाई आशा छ, दुई देशले अझ बहुपक्षीय सहकार्य गर्नेछन् । वर्तमान अवस्थामा आत्मरक्षावाद, एकत्ववाद र प्रभुत्ववाद धेरै व्याप्त छ । हामीले बहुलवाद र आर्थिक भूमण्डलीकरणलाई समर्थन गर्नुपर्छ । जलवायु परिवर्तनप्रति नेपाली पक्षको विशेष चासोलाई चिनियाँ पक्षले राम्ररी बुझेको छ । जलवायु परिवर्तनसम्बन्धी वार्ताहरुमा नेपाली पक्षको उपयुक्त मागलाई हामी पनि समर्थन गर्दछौं । नेपाली पक्षका साथ हामी जलवायु परिवर्तनको सम्वोधन प्रक्रियालाई धेरै पक्षबाट अगाडि बढाई हाम्रो हाम्रो साझा गृहस्थल विशेष गरी सगरमाथा हिमालय क्षेत्रको रक्षा गर्न सदा तत्पर रहनेछौं । मलाई धेरै खुशी लागेको छ, सबै नेपाली नेताहरुसँग हामीले मतेक्य हासिल गरेका छौं । यसपटकको भ्रमणका क्रममा मैले नेपाली नेताहरुसँग मिलेर चीन र नेपालवीचको सम्बन्धका नयाँ खाका र योजनाहरु बनाउन सकेकोमा म अत्यन्तै खुशी छु । भोलि म प्रधानमन्त्री केपी शर्मा ओलीसँग पनि दुईपक्षीय सम्बन्ध र हाम्रो साझा चासोका बारेमा विचारको आदान-प्रदान गर्नेछु । म प्रायः भन्ने गर्दछु, हामीले बनाएका योजनाहरुलाई पूरा गरेरै छोडौं । हामीले चीनमा पनि यस्तै गरेका छौं । भर्खर हामीले जनवादी गणतन्त्र चीनको स्थापना भएको ७० वर्ष बनाएका छौं । हाम्रो उद्देश्य छ, दुई शतवाषिर्कीका दुई लक्ष । यसको पहिलो लक्ष हामी आगामी वर्षमा साकार तुल्याउने छौं । दोस्रो लक्ष चाहिँ ३० वर्षपछि । तर, हाम्रो काम गर्ने मार्ग स्पष्ट छ, त्यसलाई कार्यान्वयन गर्नुपर्छ । हामी संयुक्त प्रयासद्वारा द्वीपक्षीय सम्बन्धको नयाँ भविश्य पनि निर्माण गरौं । अब म उपस्थित सबैका सामु प्रस्ताव गर्न चाहन्छु ।  नेपालको समद्धि, जनताको सुखी जीवनका लागि,  चीन र नेपालवीचको पुस्तौंपुस्ताको मित्रताका लागि,  राष्ट्रपति विद्यादेवी भण्डारी लगायत यहाँ उपस्थित सबैको सुस्वास्थ्यका लागि चियर्स !