पूर्वसञ्चारमन्त्री बाँस्कोटाको घरमा बम विस्फोटमा संलग्न आरोपमा नेत्रविक्रम चन्द समूहका तीनजना पक्राउ
<p>काठमाडौं। पूर्वसञ्चारमन्त्री गोकुलप्रसाद बाँस्कोटाको घरमा बम विस्फोट गराएको आरोपमा प्रहरीले नेत्रविक्रम चन्द नेतृत्वको नेकपाका तीनजना कार्यकर्तालाई पक्राउ गरेको छ।</p>
<p>पक्राउ पर्नेहरूमा कैलालीका लक्ष्मण सेठी र अमृत कुमाल साथै कालिकोट घर भएका टेक लोहार छन्।</p>
<p>उनीहरूलाई महानगरीय अपराध महाशाखा, काठमाडौंको टोलीले पक्राउ गरेको हो।</p>
<p>अमृत मध्यकमाण्ड सह-संयोजकको जिम्म्वारीमा रहेको खुल्न आएको महाशाखाका प्रमुख एसएसपी सहकुल थापाले देखापढीलाई बताए।</p>
<p>"तीनैजनामाथि अनुसन्धान गरिरहेका छौं। घटनाबारे अनुसन्धान जारी छ।</p>
<p>यसअघि नेत्रविक्रम चन्द नेतृत्वकै भक्तपुर जिल्ला सदस्य लमजुङ मस्र्याङ्दी गाउँपालिका-४ घर भई लोकन्थलीको सुकुम्बासी बस्तीमा बस्दै आएका ५८ वर्षीय देवीबहादुर गुरुङलाई भक्तपुर प्रहरीले पक्राउ गरेको थियो। </p>
<p>भक्तपुरको लोकन्थलीस्थित मनोहरा फाँटमा रहेको बाँस्कोटाको घरमा २८ फागुन बिहान बम विस्फोट गराइएको थियो।</p>
<p>विस्फोटमा पूर्वमन्त्री बाँस्कोटाकोसहित अन्य तीन घरमा क्षति पुगेको थियो।</p>
<p>बाँस्कोटाको घरको पर्खालभित्र प्रेसर कुकर बम राखिएको र रिमोट कन्ट्रोलबाट बम विस्फोट गराएको प्रहरीको प्रारम्भिक अनुसन्धानबाट खुलेको थियो।</p>
प्रतिक्रिया दिनुहोस्
.jpg)
