चितवनमा नौ महीनामा २२ गैँडा मरे
<p>चितवन। चितवन राष्‍ट्रिय निकुञ्‍जमा नौ महीनामा २२ वटा गैँडा मरेका छन्।</p>
<p>निकुञ्जमा प्राकृतिक कारणले गैँडा मर्नेक्रम बढ्दै गएको सहायक संरक्षण अधिकृत प्रकाश उप्रेतीले बताएका छन्।</p>
<p>उनका अनुसार गत साउनदेखि हाल सम्म २२ वटा गैँडा प्राकृतिक कारणले मरेका छन्।</p>
<p>पछिल्लो पटक ४ चैतमा पश्चिमी सेक्टरको टेम्पल टाईगर क्षेत्रमा एउटा गैँडाको हाडखोर मात्र भेटिएको छ।</p>
<p>यस अघि दुईवटा राष्ट्रिय वन क्षेत्रमा र अन्य निकुञ्ज क्षेत्रमा गैँडा मरेका थिए।</p>
<p>विषाक्त खाना, बुढो भएर, जुधेर, दलदलमा फसेर, भाले लाग्दा, लडेर, खोचमा फस्ने जस्ता कारणले गैँडा मर्ने गरेका छन्।</p>
<p>गैँडाको मृत्युदर बढेपछि गत वर्ष निकुञ्ज विभागले मृत्युको कारण अध्ययन गर्न समिति बनाएर काम गरिरहेको छ।</p>
<p>विगत केही वर्षयता चोरी शिकारीबाट भने गैँडा मारिएका छैनन्।</p>
<p>गत आर्थिक वर्षमा ४३ गैँडा प्राकृतिक कारणले मरेका थिए।</p>
<p>आर्थिक वर्ष २०७४/७५ मा २६ र २०७३/७४ मा २५ गैँडा मरेको निकुञ्‍जको तथ्यांक छ।</p>
<p>पाँच प्रतिशत गैँडाको मृत्युलाई सामान्य मानिन्छ।</p>
<p>पछिल्लो गणनाअनुसार चितवन राष्ट्रिय निकुञ्जमा ६०५ वटा गैँडा छन्। <em>रासस</em></p>
प्रतिक्रिया दिनुहोस्
.jpg)
