.jpg)
एसइई परीक्षा केन्द्र पुग्न आठ घण्टा हिउँकाे यात्रा !
<p>म्याग्दी। ६ चैतबाट शुरू हुने माध्यमिक शिक्षा परीक्षा (एसईई) मा सहभागी हुन यहाँका दुर्गम वस्तीका बालबालिकाले आठ घण्टा लामो हिउँको यात्रा गर्नुपरेकाे छ।</p>
<p>म्याग्दीको धवलागिरि गाउँपालिका-१, गुर्जास्थित जनकल्याण माविका परीक्षार्थीले आफ्नो परीक्षा केन्द्रमा पुग्न हिउँको यात्रा छिचोलेका हुन्।</p>
<p>हेम मावि सिवाङको परीक्षा केन्द्रमा सहभागी हुनका लागि विद्यालयका २३ विद्यार्थी र शिक्षकसहितको टोली हिउँले ढाकिएको बाटो छिचोलेर आएको विद्यालयका प्रधानाध्यापक रुपेश सुवेदीले जानकारी दिए।</p>
<p>तीन दिनअघि परेको बेमौसमी हिमपातले गुर्जादेखि लुलाङमाथिको जङ्गलसम्म अझै बाक्लो हिउँ छ। बाक्लो हिउँले बाटो पुरिएको र हिमपातसँगै जङ्गलमा गएको पहिरोका कारण कष्टकर तवरले यात्रा गरी परीक्षा केन्द्रमा आइपुगेको सुवेदीकाे भनाइ छ।</p>
<p>परीक्षा केन्द्र रहेको सिवाङ आइपुग्न गुर्जाबाट करीब १० घण्टा बढीको पैदल यात्रा गर्नुपर्छ। गुर्जा जिल्लाको सबैभन्दा विकट गाउँका रूपमा चिनिन्छ।</p>
<p>म्याग्दीमा यस वर्ष एसईई परीक्षामा दुई हजार १९७ जनाले सहभागिता जनाउने शिक्षा विकास तथा समन्वय एकाइले जनाएको छ। परीक्षामा एक हजार ११० छात्रा र एक हजार ८७ छात्र सहभागी हुने एकाइका प्रमुख दलबहादुर थापाले जानकारी दिए।</p>
प्रतिक्रिया दिनुहोस्
.jpg)
