टिपरको ठक्करबाट आमाछोरीको मृत्युपछि तनावग्रस्त पनौतीमा कर्फ्यू लगाइयो
<p>काठमाडौं। टिपरको ठक्करबाट आमाछोरीको मृत्यु भएपछि तनावग्रस्त बनेको काभ्रेपलाञ्चोकको पनौती बजार क्षेत्रमा जिल्ला प्रशासन कार्यालय, काभ्रेले कर्फ्यू लगाएको छ।</p>
<p>मृतकका आफन्त तथा आक्रोशित स्थानीयले प्रदर्शन जारी राखेका कारण थप घटना हुन नदिन सुरक्षा सतर्कता अपनाउँदै आज बिहान ९ बजेदेखि अनिश्‍चितकालीन कर्फ्यू लगाइएको काभ्रेका प्रमुख जिल्ला अधिकारी श्रवणकुमार तिमिल्सिनाले जानकारी दिए।</p>
<p>"पनौती बजार क्षेत्र वरपर चारकिल्ला तोकेर कर्फ्यू जारी गरिएको हो। स्थिति सामान्य भएपछि हटाउँछौ", तिमिल्सिनाले <em>देखापढी</em>सँग भने।</p>
<p>हिजो, ३ फागुन अपरान्ह बनेपाबाट पनौतीतर्फ जाँदै गरेको बा. ५ ख ५४८० नम्बरको टिपरको ठक्करबाट पैदल हिँडिरहेका खानिखोला गाउँपालिका-१ की २६ वर्षीया जुनिमाया गोले र उनकी ३ वर्षीया छोरी स्मारिकाको मृत्यु भएको थियो।</p>
<p>घटनापश्चात आक्रोशित भीडले ढुंगामुढासहित प्रदर्शन गरेपछि बजार क्षेत्र तनावपूर्ण बनेको थियो।</p>
<p>भीडलाई नियन्त्रण गर्न प्रहरीले दुई राउण्ड हवाई फायर र पाँच राउण्ड टियरग्यास प्रहार गरेको थियो।</p>
<p>प्रदर्शनकारीको आक्रमणबाट पाँचजना प्रहरी घाइते भएको प्रहरीले बताएको छ।</p>
<p>मृतकका आफन्तसँग वार्ताको प्रयास भइरहेको प्रजिअ तिमिल्सनाले बताएका छन्।</p>
<p>उनले भने, "गाडी धनी बोलाइसकेका छौं। मृतकका परिवार गाउँबाट आउँदै हुनुहुन्छ।"</p>
प्रतिक्रिया दिनुहोस्
.jpg)
