तनहुँमा २१ महीनाकी बालिकामाथि चितुवाको आक्रमण
<p>तनहुँ। चितुवाको आक्रमणबाट तनहुँको शुक्लागण्डकी नगरपालिका-३ बनकेवामा एक बालिका घाइते भएकी छन्।</p>
<p>घाइते हुनेमा सोही ठाउँ बस्ने नारायण न्यौपानेकी २१ महिनाकी छोरी संस्कृति न्यौपाने रहेको इलाका प्रहरी कार्यालय बेलचौताराले जनाएको छ।</p>
<p>हिजो, ३ फागुन साँझ घरमै ती बालिकालाई चितुवाले आक्रमण गरेको इन्सपेक्टर जगदीश रेग्मीले जानकारी दिए।</p>
<p>“छोरीलाई बाहिर राखेर एकैछिन घरभित्र पस्दा चितुवाले आक्रमण गरेको रहेछ”, रेग्मीले भने, “होहल्लापछि चितुवा भाग्यो।”</p>
<p>बालिकाको पेटमा सामान्य चोट लागेको छ । उनलाई दुलेगौडास्थित तनहुँ सेवा अस्पतालमा प्राथमिक उपचारपश्चात थप उपचारका लागि पोखरास्थित मणिपाल शिक्षण अस्पताल लगिएको छ।</p>
<p>तनहुँमा चितुवाको आक्रमण बढ्दै जाँदा स्थानीयवासी त्रसित छन्। </p>
<p>भानु नगरपालिका, शुक्लागण्डकी नगरपालिका, आँबुखैरेनी गाउँपालिका र बन्दीपुर गाउँपालिकामा चितुवाको आतंक छ।</p>
<p>पछिल्लो २० महीनामा तनहुँमा चितुवाको आक्रमणबाट नौ बालबालिकाले ज्यान गुमाएका छन् ।</p>
<p>चितुवाको आक्रमण बढ्दै गएपछि डिभिजन वन कार्यालयले चितुवा नियन्त्रणमा लिने प्रयास पनि गरेको छ।</p>
<p>हालसम्म जिल्लामा सात चितुवा नियन्त्रणमा लिइएको छ।</p>
प्रतिक्रिया दिनुहोस्
.jpg)
