पेन्टागुलर सिरिज : ओमानसँग नेपाल ६ विकेटले पराजित
<p>काठमाडौं । कमजोर ब्याटिङ गर्दा ‘ओमान पेन्टागुलर टी-२० अन्तर्राष्ट्रिय सिरिज’ को अन्तिम खेलमा नेपाल घरेलु टोली ओमानसँग ६ विकेटले पराजित भएको छ।</p>
<p>यसअघि खेलेको तीन खेलमा मध्यम ब्याटिङ गरेको नेपालले ओमानविरुद्ध भने निकै फितलो ब्याटिङ गर्दा जम्मा ६४ रनमा अलआउट भएको थियो।</p>
<p>६५ रनको लक्ष्य ओमानले ११.५ ओभर खेल्दै ४ विकेट गुमाएर पूरा गरेको हो।</p>
<p>ओमानको जितमा विकेटकिपर ब्याट्सम्यान सुरज कुमारले नटआउट ४२ रन बनाए। उनले ३० बल खेल्दै २ चौका र ३ छक्का प्रहार गरे।</p>
<p>नेपालले पहिलो खेलमा हङकङ र दोस्रोमा नेदरल्याण्ड्सलाई समान ४ विकेटले हराएको थियो। तेस्रो खेलमा भने टेष्ट राष्ट्र आयरल्याण्डसँग १३ रनले पराजित भएको थियो।</p>
<p>टस हारेर पहिले ब्याटिङ गरेको नेपालले खराब ब्याटिङ गर्दा ११ ओभर मात्र क्रिजमा टिक्यो र ६४ रनमै अलआउट भयो। नेपालका लागि आरिफ शेखले २० र दीपेन्द्र सिंह ऐरिले ११ रन बनाउनु बाहेक बाँकी खेलाडीले दोहोरो अंककाे रनसमेत बनाउन सकेनन्।</p>
<p>नेपाललाई कम स्कोरमा अलआउट गर्न अमिर कलिम एक्लैले ५ विकेट लिए। कलिमले ४ ओभरमा १५ रन मात्र खर्चिए। यस्तै बिलाल खानले २ विकेट लिए। पाँच राष्ट्र सहभागी सिरिजमा घरेलु टोली ओमानले अपराजित रहँदै सिरिज जितेको छ।</p>
<p>ओमानले सबै चार खेल जितेको हो। चारमध्धे दुईमा जित र दुईमा हार को नतिजा निकालेको नेपाल ४ अंकसहित तेस्रो भयो। तीन जित र एक हारसहित आयरल्याण्ड दोस्रो भयो। आजै भएको खेलमा हङकङलाई पराजित गर्दै नेदरल्याण्ड्स चौथो भयो। हङकङ भने जितविहीन बन्यो।</p>
प्रतिक्रिया दिनुहोस्
.jpg)
