अज्ञात समूहद्वारा डोजरमा आगजनी
<p>म्याग्दी। म्याग्दीको मालिका गाउँपालिका-६ रातोढुंगामा स्काभेटर र ब्याकुहोलोडरमा अज्ञात समूहले आगजनी गरेका छन्।</p>
<p>क्याराभान कन्ट्रक्सनले बेनी-दरवाङ सडक आयोजनाअन्तर्गत लाम्पाटा-दरवाङ खण्डको सडक स्तरोन्नतिमा प्रयोग गरेको ती सामग्रीमा गएराति आगजनी भएको हो।</p>
<p>आगजनीबाट ब्याकुहोलोडरको सबै भाग जलेर नष्ट भएको र स्काभेटरको आधा भाग जलेपछि आगो नियन्त्रणमा लिएको इलाका प्रहरी कार्यालय दरवाङका इन्सपेक्टर रामचन्द्र अधिकारीले बताए।</p>
<p>प्रहरी, जनप्रतिनिधि र निर्माण कम्पनीका प्रतिनिधिले आगो निभाएका थिए।</p>
<p>आगजनी कसले के कारणले गरेको भन्ने विषयमा अनुसन्धान भइरहेको अधिकारीले जानकारी दिए।</p>
<p>कम्पनीका संचालक सोमनाथ थकालीले आगजनीबाट एक करोडभन्दा बढीको क्षति भएको छ।</p>
<p>पूर्वाधार विकास कार्यालय म्याग्दीमार्फत लाम्पाटादेखि दरवाङ जोड्ने छ किलोमिटर सडक कालोपत्रे गर्न क्याराभान कन्ट्रक्सनले गत जेठमा ठेक्का लिएको थियो ।</p>
<p>म्याग्दीमा यसअघि गत साउनमा बेनी नगरपालिका-५ बगुवाखोलामा बिएन कन्ट्रक्सनका तीन वटा स्काभेटरमा आगजनी गरिएको थियो।</p>
प्रतिक्रिया दिनुहोस्
.jpg)
